Gubernur Koster Ngamolihang Suntikan Kapertama Vaksin Covid-19 ring Pulo Bali
- 14 Januari 2021
- 21:01 WITA
- News
DENPASAR, Balitopnews.com - Gubernur Bali, Wayan Koster ngamolihang suntikan kapertama vaksin Covid-19 ring Provinsi Bali, Wraspati (14 Januari 2021) ring Rumah Sakit Bali Mandara (RSBM), Sanur Kauh, Kota Denpasar.
Penyuntikan vaksin majeng Gubernur Provinsi Bali puniki, kalaksanayang olih dr. Putu Gede Surya Wibawa, M.Biomed, Sp.PD sane pinaka silih tunggil dokter penyakit dalam ring RSBM.
Penyuntikan kapertama majeng Gubernur Koster antuk Vaksin Covid-19 sane kakirim olih Biofarma Bandung punika nyihnayang program vaksinasi ring Provinsi Bali ngawit kamargiang resmi risampune daweg rahina Buda (13 Januari 2021) ) Presiden RI Joko Widodo pinaka kapertama ring Indonesia sane ngamolihang suntikan vaksin Covid-19 sane kakaryanin antuk paerusahaan saking China, Sinovac ring Kompleks Istana Kepresidenan Jakarta.
"Bapak Presiden RI, Joko Widodo sampun ngicen conto wiadin tetuladan majeng krama Indonesia, rumasuk majeng Provinsi Bali, mawinan titiang nenten sumanangsaya yening vaksin puniki sampun prasida kamargiang sinarengan mangda pandemi Covid-19 prasida digelis puput. Sangkaning punika, tiang nyanggra becik pamargin vaksin puniki sane kalaksanayang Dinas Kesehatan Provinsi Bali, miwah titiang ngaturang suksma dahat majeng Pemerintah Pusat sane sampun dahat urati majeng Pulo Bali, antuk ngicen vaksin Covid-19," baos Gubernur Bali saking Desa Sembiran puniki ri kala ngicen sambrama wacana sajeroning pamargin Vaksin Covid-19 ring Provinsi Bali, sinambi ngamiletin paletan pamargin vaksinisasi minakadi registrasi, screening kesehatan, penyuntikan vaksin Covid-19, saha pinih untat ngeranjing ring ruang observasi selami 30 menit.
Risampun ngeranjing ring ruang observasi selami 30 menit kasarengin 15 pejabat sane tiosan, sekadi Kapolda Bali, Irjen Pol Putu Jayan Danu Putra, Kasdam IX Udayana, Brigjen TNI Candra Wijaya, Kejati Bali, Erbagyo Rohan, SH, MH, Kepala BPK RI Wilayah Bali, DR. Drs. Sri Haryono, DPD-RI Perwakilan Bali, Bambang Suseno, Kepala BPOM Bali, DRA. Ni G.A.N Suarningsih, Sekda Bali, Dewa Made Indra, Kepala BPBD Bali, Drs. I Made Rentin, M.Si, Kakesdam IX/Udayana, I Made Mardika, Kepala BPKP Bali, Muhammad Masykur, Ketua PHDI Bali, Prof. Dr. Drs. I Gusti Ngurah Sudiana., M.Si, Deputi BPJS, Beno Herman, Direktur RSUP Sanglah, dr. I Wayan Sudana, M.Kes, dan DPW PPNI Bali, I Gusti Ngurah Ketut Sukadarma, saha Gubernur Bali tamatan ITB puniki ngrastiti mangda pamargin vaksin puniki prasida mamargi antar, nganutin geguat sane wenten.
Pecak Anggota DPR-RI 3 Periode saking Fraksi PDI Perjuangan puniki taler nuekang yening Bali sane kautamayang sajeroning ngarepin Covid-19, saantukan Bali pinaka genah pariwisata internasional. Sangkaning punika, Pemerintah Pusat sampun ngicen vaksin sane rumasuk akeh majeng Bali antuk pangapti mangda Pandemi Covid-19 prasida puput, saha prasida digelis nangiang ekonomi ring Provinsi Bali.
"Iraga prasida nyantenang sapunapi pariwisata Bali wiadin ekonomi Bali banget kakaonang sangkaning pandemi puniki, saha pangaptine mangda pandemi puniki digelis puput, pamargin vaksin prasida mamargi antar, krama kenak rahayu saha sareng sami prasida nangiang ekonomi ring Provinsi Bali," baos Gubernur Koster sane taler pinaka Ketua DPD PDI Perjuangan Provinsi Bali.
Kepala Dinas Kesehatan Provinsi Bali, dr. Ketut Suarjaya nguningayang yening tetujon saking vaksinasi Covid-19 puniki sajeroning ngwangun kekebalan kelompok, saha nees kawentenan krama sane padem sangkaning Covid-19, nyayubin krama, nyaga produktivitas saha nees kawentenan pawesana sosial, wiadin ekonomi.
"Ring vaksinisasi puniki, vaksin sane kaicen akehnyane nyantos 2.999.400, antuk pawilangannyane kaicen majeng Tenaga Kesehatan wiadin Tenaga Penunjang Faskes, rumasuk Tenaga Tracing sane akehnyane 30.320, kalanturang majeng Pelayan Publik sekadi TNI, POLRI, Satpol PP, Guru, rauhing Aparat Hukum sane akehnyane 263.389, kalanturang raris majeng Masyarakat Rentan (geo spasial, sosial ekonomi, red) sane akehnyane 1.290.243, miwah kaicen majeng krama wiadin Pelaku Ekonomi sane akehnyane 854.756, taler kaicen majeng Masyarakat Rentan (Lansia, red) sane akehnyane 560.782," baos Kadiskes Bali, dr. Ketut Suarjaya sinambi maosang yening sane karuruh kapertama wantah ngicen vaksin ring krama sane mayusa 18-59 warsa saha kalanturang antuk sane mayusa 60 warsa.
Pinaka pamuput, dr. Ketut Suarjaya nuekang risampune kamargiang vaksinasi ring Provinsi Bali puniki, titiang uningayang yening para Tenaga Kesehatan sane wenten ring Kabupaten Badung, Kabupaten Gianyar, miwah Kota Denpasar sane riinan ngamolihang vaksin Covid-19 ini.
"Mapaiketan ring akehnyane, majeng Kabupaten Badung wenten 5.533 Tenaga Kesehatan sane sampun sayaga ngamolihang vaksin, kalanturang Tenaga Kesehatan ring Kabupaten Gianyar sane akehnyane 4.231, kalanturang Kota Denpasar akehnyane 12.032 Tenaga Kesehatan san taler sampun sayaga ngamargiang vaksin," baosnyane.(gix)
Komentar