Pusat Kesenian Bali dados Reriptan Mautama ring Jaman Mangkin. Krama sane Nuwenang Tanah Masikian Nyokong Pewangunan PKB
- 21 Januari 2021
- 21:01 WITA
- News
KLUNGKUNG, Balitopnews.com - Pewangunan Pusat kebudayaan Bali (PKB) ring wewidangan sane sadurungnyane pinaka Galian C Gunaksa, Kabupaten Klungkung pinaka reriptan mautama ring jaman kadi mangkin, pinaka program utamannyane wantah ngwangun adat, seni budaya Bali.
Sekadi punika baos Gubernur Bali Wayan Koster ring parikrama Sosialisasi Kegiatan Inventarisasi miwah Identifikasi Data penguasaan, Pemilikan, Penggunaan lan Pemanfaatan miwah Pihak Pihak Berhak wiadin Obyek Pengadaan Tanah Pembangunan Pusat Kebudayaan Bali, Prasarana Pengendali Banjir Tukad Unda miwah Waduk Muara Unda ring Balai Budaya Ida I Dewa Agung Istri Kanya, Semarapura, Kabupaten Klungkung, Wraspati ( 21 Januari 2021).
“Pewangunan (Pusat kebudayaan Bali, red) puniki wantah kamargiang apisan kemanten ring kauripan puniki, para prati sentana salanturnyane wantah mretenin saha ngawigunayang kewanten sabecik-beciknyane. Manawi ring pamargin kauripan puniki, wantah ngalimangatus warsa apisan wenten pewangunan mautama sekadi puniki,” baos Gubernur Koster.
Ring ajeng panyatusan krama sane nuwenang tanah, Gubernur Koster maosang sekadi ring Candi Prambanan utawi Borobudur, pewangunan sane dahat mautama wantah prasida kamargiang yening jagate asung ngicen wara nugraha melarapan antuk angga-angga sane madue manah lascarya.
“Saking dumun genahe puniki jagi kaanggen majeng makudang-kudang proyek, nanging nenten naenin mamargi, saantukan yening manahe kaon majanten jagate nenten asung ngicen wara nugraha. Tanah puniki sampun nenten kawigunayang saking warsa 1963. Sane mangkin titiang ngambil pamargi, ngayah madasar kalascaryan sekala wiadin niskala antuk pangapti sane becik, mangda wewidangan puniki sayan mawiguna majeng Bali, Nasional rauhing Internasional. Astungkara jagi mamargi antar,” baos Gubernur Bali lulusan ITB Bandung puniki.
Dane nglanturang, ngawit kapamucukannyane napi malih sadurung kapikukuhang pinaka gubernur sampun mapikayun ngwangun samian sarana seni wiadin budaya sane becik majeng Bali, saha ring pamarginnyane akeh manggihin pialang.
“Desainnyane kakaryanin antuk arsitek sane kasub, krama Bali. Ngayah tan paprabea. Punika taler sareng wantuan normalisasi Tukad Unda olih Kementerian PU sane nelasang prabea Rp 270 M (miliar, red), kalanturang antuk pewangunan waduk muara. Dadosnyane, wewidangan puniki kapidabdabin mangda nenten kantos embid utawi longsor, blabar madaging lahar, wiadin sane tiosan,” baos Gubernur. Majeng prabea pewangunan jagi kasokong antuk pinjaman Pemulihan Ekonomi Nasional (PEN) sane agengnyane RP 2,5 triliun.
Gubernur saking Desa Sembiran, Kabupaten Buleleng puniki ngawewehin, wewidangan Pusat Kebudayaan Bali sane jagi kawangun ring tanah sane jimbarnyane 320 hektar puniki wantah madaging indik semertin visi Nangun Sat Kerthi Loka Bali melarapan Pembangunan Semesta Berencana ngulati Bali Era Baru. Pamarginnyane sekadi melarapan antuk kawentenan hutan buatan, taman, sarana seni, pameran, kuliner UMKM kantos waduk, pelabuhan saha ngardi wewidangan puniki dados wewidangan sane tegep, madaging semertin saking visi pembangunan Bali.
“Saking Atma Kertih rauhing Wana Kertih sane wenten, genahnyane taler dahat becik, Nyegara Gunung. Tiang sampun nureksain genah, nenten wenten sane sabecik puniki,” baosnyane.
Punika taler ring kawentenan sejarahnyane, Klungkung pinaka genah antuk kabudayan Balinyane prasida nglimbak napi malih naenin dahat nglimbak daweg Kerajaan Gelgel, sapamadegan Raja Dalem Waturenggong.
Punika taler, Gubernur Koster ngaptiang mangda krama sane nuwenang tanah sane mawit saking Desa Tangkas, Desa Jumpai, Desa Sampalan Kelod miwah Desa Gunaksa taler nyokong pewangunan Pusat kebudayaan Bali melarapan geguat sane wenten pamekas Undang-Undang Nomor 2 Warsa 2012 nganinin indik pengadaan tanah majeng pewangunan sane kabuatang majeng pabuat umum.
“Kaaptiang mangda nganutin geguat sane wenten saha tiang ngaptiang majeng BPN (Badan Pertanahan Nasional, red) Klungkung mangda mautsaha pisan negepin prasarat dokumen mawinan prasida langsung kataur. BPN mangda mautsaha pisan saantukan krama sane nuwenang tanah puniki sane kautamayang pisan antuk kementerian pertanahan,”baosnyane. “Nanging tiang nuekang, sampunang kantos wenten sane ngambil pamargi kaon, dados calo, wiadin manah kaon sane tiosan saantukan jagi ngarepin tiang wiadin penegak hukum,” baosnyane.
Krama sane nuwenang tanah taler kapastikayang nenten ngamolihang jinah ganti rugi tanahnyane kewanten, nanging taler ngamolihang kawigunan sane tiosan melarapan pewangunan sarana seni budaya puniki sane katarka jagi muatang pamikarya 10 tali pamikarya. “Pamikaryanyane jagi kautamayang pamikarya ring wewidangan irika. Tiosan punika taler prasida ngadol produk kerajinan lokal wiadin UMKM,” baosnyane.
Ngarepin parindikan punika, panyatusan krama sane rauh tepuk tangan saha nguningayang cumpu majeng pewangunan puniki. Krama masikian saajeroning nyokong pewangunan puniki saha ganti rugi sane kaicen taler jagi nganutin geguat sane wenten.
Kepala BPN Klungkung Cok Gede Agung Astawa ngaptiang ring sane nuwenang tanah mangda nyokong pamargin inventarisasi sane kalaksanayang antuk BPN Klungkung mawinan sayan gelis kaicen ganti rugi. “Titiang taler sampun makarya satgas saha jagi langsung ngruruh krama sane nuwenang tanah,” baosnyane.
Ring pamargin punika, taler karauhin antuk Bupati Klungkung Nyoman Suwirta, manggalaning OPD sane mapaiketan saking undagan provinsi, kabupaten wiadin moncoling krama ring Kabupaten Klungkung.(gix)
Komentar