Gubernur Koster : PKK Madue Amongan Ageng Sajeroning Nyokong Program Pemerintah
- 24 Maret 2021
- 22:03 WITA
- News
DENPASAR, Balitopnews.com - Gubernur Bali Wayan Koster miwah Ketua TP PKK Provinsi Bali Putri Koster ngrauhin pamargin pakeling Hari Kesatuan Gerak (HKG) ka-49 Warsa 2021 ring Gedung Ksirarnawa, Taman Budaya Denpasar, Buda (24 Maret 2021).
Gubernur Bali Wayan Koster pinaka Ketua Pembina TP PKK Provinsi Bali nuekang indik mabuatnyane pangrembe saking PKK sajeroning nyokong pamargin program-program pemerintah ring tengahing krama, pinaka organisasi sane madue struktur sane tinas ngawit ring pusat kantos Dasa Wisma. PKK taler mabuat kawentenane sajeroning nyobiahang wiadin ngamargiang program pemerintah.
Sangkaning punika, Gubernur nguningayang kasumekenan uratiannyane majeng program-program Tim Penggerak PKK Provinsi Bali mangda prasida mamargi antar. Ring soang-soang TP PKK ring kabupaten/kota ngamolihang anggaran Rp 500 yuta sajeroning ngamargiang programnyane.
“Kasumekenan uratian majeng PKK kacihnayang antuk nyokong kawentenan anggaran sane satunggil warsa setata nincap ngawit warsa 2019, 2020. Ring warsa salanturnyane kaaptiang sayan nincap. Kawijakan puniki kaambil saantukan Tim Penggerak PKK madue landasan hukum miwah kelembagaan sane tinas saha kawentenannyane dahat mabuat sajeroning nyokong program pemerintah,” baos Gubernur.
Putri Koster maosang, mapaiketan ring pakeling Hari Kesatuan Gerak PKK ka-49 Warsa 2021 sampun kalaksanayang makudang-kudang parikrama minakadi Parikrama Sosial antuk ngicen makudang-kudang wantuan. Sekadi ngicen wantuan beras 500 kg majeng Balita Gizi Buruk dan Ibu Hamil KEK (Kekurangan Energi Kronis) miwah 30 kaleng susu antuk soang-soang 850 gram majeng balita gizi buruk ring soang-soang kabupaten/kota sajebag Bali.
Parikrama sosial taler maprakanti sareng Ikatan Bidan Indonesia (IBI) Provinsi Bali sane ngicen wantuan PMT majeng Ibu Hamil KEK miwah Ketua TP PKK Kabupaten/Kota sajebag Bali, ngicen wantuan paket makanan wiadin sane tiosan nganutin ring kahanan soang kabupaten/kota. Salanturnyane ngicen wantuan masker saking TP PKK Pusat majeng TP PKK Kabupaten/Kota, saha soang-soang kaicen 50 dus @ 500 pcs, salanturnyane kasukserahang majeng TP PKK Kabupaten/Kota saha malih kasukserahang ring TP PKK Kecamatan/Desa/Kelurahan. Parikrama sosial puniki kakawitin saking rahina Anggara, 2 Maret 2021 ring Kabupaten Buleleng saha pinih untat kalaksanayang tanggal 22 Maret 2021 ring Kota Denpasar. Salanturnyane ngamargiang vaksinasi COVID-19 majeng pengurus Tim Penggerak PKK Provinsi Bali sajeroning nyokong program vaksinasi sane kalaksanayang saking rahina Saniscara, 6 Maret 2021 ring Kertha Sabha, sinarengan sareng PAKIS Bali wiadin krama tiosan.
“Makudang-kudang parikrama sane tedun langsung ngwantu krama puniki kalaksanayang, tiosan matetujon nyelehin kawentenan krama, sepisanan ngicen pengaat majeng krama wiadin kader PKK mangda setata saling wantu. Yening puniki kamargiang olih samian krama, majanten nenten wenten krama sane kantos sangsara ring masa pandemi sekadi mangkin,” baos Putri Koster.(gix)
Komentar