Ketua TP PKK Provinsi Bali Ngelingang Mangda Program Kerja Madue Sistem wiadin Pola
- 28 April 2021
- 22:04 WITA
- News
DENPASAR, Balitopnews.com - Rapat kerja daerah pinaka forum pinih ageng majeng Tim Penggerak PKK Provinsi Bali sane nyarengang samian Tim penggerak PKK sajebag-Bali antuk virtual, kaaptiang prasida dados galah sajeroning mligbagang program kerja ring limang warsa sane jagi rauh mawinan prasida ngicen pawesana becik majeng krama.
Kawentenan Tim Penggerak PKK sane nyokong program pemerintahan sajeroning ngardi kelembagaan sane sehat majeng kasukertan krama, madue amongan sane dahating mabuat pinaka perpanjangan tangan pusat sane salanturnyane kalanturang ring kabupaten wiadin desa mawinan prasida kauningayang makudang-kudang program sane tersinergitas wiadin harmonis.
Parindikan punika kauningayang antuk Gubernur Bali sajeroning sambrama wacanannyane sane kawacen Asisten I Bidang Pemerintahan dan Kesra Setda Provinsi Bali I Gede Indra Dewa Putra sajeroning rapat konsultasi mapaiketan sareng penyusunan strategi gerakan PKK miwah Rakerda PKK Provinsi Bali Warsa 2021, ring Gedung Wiswa Sabha Utama, Buda (28 April 2021)
Sajeroning ngadungang pantaraning program pusat sareng program daerah, ngardi krama sane sukerta antuk kawentenan kauripan sane sehat, Tim Penggerak PKK Provinsi Bali pinaka organisasi gerakan masyarakat sane nyayubin krama saha maprakanti sareng pemerintah sajeroning program pembangunan keluarga, jagi setata midabdabin saha makarya strategi gerakan PKK, mawinan prasida nangiang sinergitas wiadin kemitraan sane pinaka dasar sajeroning ngardi kulawarga sane madue daya saing saha sukerta.
Ketua Tim Penggerak PKK Provinsi Bali Ny Putri Suastini Koster sajeroning atur piuningnyane maosang yening program tim penggerak PKK sampun sapatutnyane adung sareng program pusat, mangda tinas kawentenannyane. "Conto sane prasida kaambil mapaiketan ring HATINYA PKK yening program punika sampun sapatutnyane kamargiang saha nenten kamargiang ri kala lomba kemanten, nanging semertin saking kawentenan lomba punika majanten mangda prasida katulad antuk anak tiosan. Antuk punika sayan nglimbak kawentenan HATINYA PKK ring soang-soang paumahan krama, " baosnyane.
Ring warsa salanturnyane, Ny Putri Koster jagi makarya lomba pantaraning kecamatan, saha jagi katureksain sapunapi pangremba saking HATINYA PKK sajeroning nyobiahang kawigunannyane majeng samian krama desa.
Tiosan punika, taler kabaosang indik mabuatnyane soang-soang desa wiadin wewidangan mangda madue sistem wiadin pola penanganan sampah. Mawinan luu sane kaasilang olih desa nenten raris kabakta ring desa tiosan.
"Parindikan puniki mabuat mangda nenten raris wenten silih tunggil desa dados genah penampungan sampah, sane majanten jagi mawesana kaon majeng krama wiadin palemahan ring wewidangan irika. Saantukan patut kaangkenin yening sistem wiadin pola pengolahan sampah nenten kalaksanayang ngawit mangkin, majanten jagi ngawetuang pikobet ageng ring benjang pungkur," baos Ny Putri Koster.
Melarapan antuk rapat konsultasi miwah rapat kerja daerah puniki kaaptiang jagi prasida ngasilang program-program pendukung program pembangunan pemerintah melarapan visi "Nangun Sat Kerthi Loka Bali", sane madue semerti nyaga kasucian wiadin degdegnyane jagat Bali saha sadaging ipun, mawinan prasida ngardi kauripan krama Bali sane sukerta bagia sekala-niskala, nyujur kauripan Krama wiadin Gumi Bali nganutin sareng Prinsip Trisakti Bung Karno: Berdaulat secara Politik, Berdikari Secara Ekonomi, dan Berkepribadian alam Kebudayaan melarapan Pembangunan Secara Terpola, Menyeluruh, Terencana, Terarah, miwah terintegrasi Dalam Bingkai Negara Kesatuan Republik Indonesia sane kadasarin antuk Nilai-Nilai Pancasila 1 Juni 1945.
Melarapan antuk evaluasi kegiatan taler kaanggen maripurnayang saha kaanggen geguat ring warsa salanturnyane, antuk tetujon mangda samian anggota tim penggerak PKK Bali prasida uning ring program sane jagi kalaksanayang melarapan antuk sinergitas program tim penggerak PKK Warsa 2021 lintas wilayah wiadin lintas sektoral.
Mapaiketan ring masa pandemi Covid-19, Ketua TP PKK Provinsi Bali taler nyarengang samian kader tim penggerak PKK sajebag Bali nyarengin nyobiahang majeng krama mangda setata ngamargiang pakesiar pemerintah mapaiketan ring protokol kesehatan, mangda kawentenan virus corona nenten nglahlah, mawinan kauripan mawali sekadi sadurungnyane, saha mawesana becik majeng widang ekonomi.(Gix)
Komentar