Pemprov Bali Ngicen Penghormatan Terakhir Majeng 53 Prajurit TNI AL KRI Nanggala 402

  • 30 April 2021
  • 21:04 WITA
  • News
Pemprov Bali Ngicen Penghormatan Terakhir Majeng 53 Prajurit TNI AL KRI Nanggala 402

BULELENG, Balitopnews.com - Pemerintah Provinsi Bali nglaksanayang Upacara Mapekelem miwah Tabur Bunga, Wraspati 29 April 2021 ring Dermaga Labuan Lalang, Sumberklampok, Buleleng, sajeroning ngicen penghormatan terakhir majeng 53 Prajurit TNI Angkatan Laut (AL) KRI Nanggala 402 sane kelem ring sisi kaler segara Bali.

 

Upacara antuk kahanan nasionalisme kapuput antuk Ida Pandita Dukuh Tri Budha Nata Giri Nandha, karauhin Tokoh Umat Beragama saking FKUB Provinsi Bali, Wagub Tjokorda Oka Artha Ardana Sukawati, Pangdam IX Udayana Mayjen TNI Maruli Simanjuntak, Kapolda Bali Irjen Pol Putu Jayan Danu Putra, Danlanal Denpasar Lantamal V Kolonel Laut (P) I Komang Teguh Ardana, Sekda Provinsi Bali, Dewa Made Indra, Bupati wiadin Wakil Bupati Buleleng Putu Agus Suradnyana kasarengin dr. Nyoman Sutjidra, Bupati Jembrana, Nengah Tamba, Wakil Bupati Bangli, I Wayan Diar, Ketua DPRD Buleleng, Gede Supriatna, saha angga saking kulawarga sang palatra Kapten Laut I Gede Kartika, Wayan Darmanta.

 

Gubernur Koster maosang Upacara Mapakelem wiadin Tabur Bunga picaka cihna uratian saha rasa tresna majeng prajurit TNI, pinaka sesamen umat manusia, pinaka kulawarga antuk siki wangsa panegara wiadin tanah air sekadi sane munggah ring Kitab Upanisad sane kabaosang Vasudewa Kutumbakam (sami ring jagate wantah kulawarga), Tat Twam Asi (Samian wantah Sameton) sane pinaka cihna pamargin nilai kemanusiaan sane universal wiadin nilai keagamaan sajeroning nyujur rasa santi sepisanan nincapang rasa tresna majeng samian sane maurip. 

 

Tiosan punika, Gubernur Bali taler maosang, mapaiketan ring acara puniki, Megawati Soekarnoputri, Presiden Ka-5 RI sampun ngicen piteket mangda ngamargiang parikrama doa wiadin tabur bunga puniki pinaka rasa tresna sepisanan nginggilang wiading penghormatan majeng prajurit patriot bangsa pamekas 53 diri sane palatra ring kapal selam KRI Nanggala 402.

 

"Sangkaning rasa tresna saha nginggilang pabelapatian majeng prajurit TNI AL, Dane (Megawati Soekarnoputri, red) sane makarya desain karangan bunga ageng puniki nganggen konsep Merah Putih, malakar antuk sekar rumawa tegep antuk moto : Untuk Indonesia Raya, Wira Ananta Rudhiro, Tabah Sampai Akhir. Taler kadagingin pesengan 53 diri prajurit pinaka penghormatan majeng 53 diri prajurit sane palatra saha ring sisi tengen karangan bunga kadagingin Bendera Merah Putih setengah tiang. Ibu Megawati Soekarnoputri tinas pisan ngicen piteket majeng tiang, mangda sayuwakti kamargiang becik, punika cihna tresna saha ngajiang pabelapatian 53 prajurit sane sampun palatra," baos Koster.

 

Koster nlatarang, ring kauripan maagama ring Bali, pinaka cihna pamargin saking daging ajah-ajah Sad Kertih, Upacara Mapekelem madue semerti ngalungsurang ring Ida Sang Hyang Widhi Wasa antuk prabawan ida marupa Dewa Baruna sane ngawiwasa samudra, mangdane prasida ngicen karahayuan ring segara mawinan mawesana becik majeng kauripan ring jagate puniki.

 

Tiosan punika, melarapan antuk kawentenan bancana puniki, kelemnyane Kapal Selam KRI Nanggala 402, rumasuk Gering Agung Covid-19 sane kantos  mangkin durung ical, majanten jagi sayan ngukuhang sradha yening jagate puniki pinaka kesatuan hukum (Satyam, Rtam, wiadin Dharma) sane patut katitenin kasucian wiadin kadegdegannyane, saantukan manusa nenten prasida lempas saking hukum alam.

 

Pinaka pamuput, Wayan Koster maosang, ngangganin Pemerintah Provinsi Bali wiadin samian krama Bali, titiang nguningayang duka cita antuk palatranyane 53 prajurit TNI Angkatan Laut KRI Nanggala 402 sajeroning ngamargiang swadarmannyane ring perairan utara Bali.

 

"Samian punika majanten pinaka pahlawan, putra-putra pinih becik duwen wangsa. Para prajurit sane sampun ngamargiang swadarmannyane nenten surud-surud nitenin kedaulatan wangsa wiadin panegara. Ayah-ayahannyane majanten jagi setata kaelingang ring hati sanubari samian krama Indonesia. Maka pamuput atur, Tiang nyarengang samian angga mangda ngrastitiang samian sane palatra ring KRI Nanggala 402, prasida ngamolihang genah sane pinih becik saha kulawarga sane katilarin prasida lascarya. Mugi melarapan antuk Upacara Mapakelem wiadin Tabur Bunga puniki, kaaptiang prasida nangiang energi positif saking jagate puniki mawinan vibrasi saking pamargin doa bersama puniki prasida ngawetuang kahanan kauripan sane shanti," panyineb aturnyane.(gix)


TAGS :

Komentar