Waspada Gageem Siber, Pemprov Bali Ngamedalang BALIPROV-CSIRT
- 05 Mei 2021
- 23:05 WITA
- News
BADUNG, Balitopnews.com - Akehnyane sane ngamaling data, gatra hoax kantos ring gageem elektronik ngamatutang Pemerintah Provinsi Bali setata maparidabdab mecikang ayah-ayahannyane rauhing ring administrasi.
Ring legalitas ipun, instansi Pemprov Bali sampun ngawigunayang sistem E-Office sane nganggen Tanda Tangan Elektronik bersertifikasi saking Balai Sertifikat Elektronik BSrE. Pemprov Bali taler dados silih tunggil saking tlulas instansi pemerintah daerah sane kautamayang ring nasional ngwangun Computer Security Incident Response Team (CSIRT) warsa 2021, tiosan ring 12 instansi pemerintah pusat.
Parindikan punika kabaosang Sekretaris Daerah Provinsi Bali Dewa Made Indra ri kala pamargin peluncuran BALIPROV- CSIRT, ring Padma Hotel Resort Bali, Buda (5 Mei 2021).
"Saantukan sane mangkin sampun ngranjing ring tunggil sistem pemerintahan berbasis elektronik saha kaselehin dangan pisan katiben gageem ring dunia maya (siber). Sangkaning punika ri kala sampun ngranjing ring sistem pemerintahan sane nganggen teknologi informatika, mawinan kabuatang mangda madue daya tahan sane sayuwakti kukuh sajeroning ngarepin gageem sane wenten ring dunia siber. Mawinan samian instansi pemerintahan taler kapatutang madue tunggil sistem sane prasida ngarepin gageem, mawinan informasi pemerintahan nenten raris prasida kaolah antuk angga tiosan," Sekda Dewa Indra nuekang.
Nganutin SK Gubernur Bali No. 326/03-E/HK/2021 kaunggahang pinaka Ketua BALIPROV-CSIRT wantah Kepala Dinas Komunikasi Informatika dan Statistik Provinsi Bali.
Munggah pinaka koordinator BALIPROV-CSIRT minakadi Kepala Dinas Komunikasi, Informatika dan Statistik (Diskominfos) Provinsi Bali wiadin konstituennyane samian Kepala Perangkat Daerah sane wenten ring kakuub Pemerintah Provinsi Bali, Computer Security Incident Response Team Provinsi Bali (BALIPROV-CSIRT) ketah ipun wantah nglaksanayang koordinasi wiadin kolaborasi layanan keamanan siber makamiwah ngwangun kapasitas sumber daya keamanan siber ring Pemerintah Provinsi Bali.
Kepala Badan Siber dan Sandi Negara (BSSN) Letnan Jenderal TNI (Purn) Hinsa Siburian sane nyarengin melarapan antuk virtual maosang yening kawentenan CSIRT dahat mabuat kawentenannyane sajeroning nyayubin kawentenan data, identitas wiadin administrasi saking gageem ring dunia maya sane kalaksanayang olih duratmaka. Melarapan antuk kawentenan tim sane sayuwakti becik, kaaptiang prasida ngwantu pemerintah sajeroning nglola kerahasiaan daerah, nyokong pewangunan daerah wiadin kramaipun.
Samian gatra mapaiketan sareng profil wiadin layanan BALIPROV-CSIRT sampun prasida karuruh olih samian angga ring alamat csirt.baliprov.go.id.
Sajeroning nyokong program nasional sepisanan nincapang penyayub majeng data, ngawinang pemerintah Provinsi Bali nganggen sistem berbasis elektronik sane kawantu antuk BSSN pinaka institusi negara sane madue amongan pemerintahan nyayubin keamanan siber duwen pemerintah.
Tiosan melarapan antuk virtual sane karauhin olih Bupati/Walikota sajebag Bali wiadin wewidangan tiosan ring Indonesia, launching BALIPROV-CSIRT taler karauhin langsung olih Deputi Bidang Penanggulangan dan Pemulihan BSSN Mayjen TNI Yoseph Puguh Eko Setyawan, sane sepisanan nyukserahang Surat Tanda Registrasi CSIRT majeng Sekretaris Daerah Provinsi Bali Dewa Made Indra.(gix)
Komentar