Gubernur Koster Ngajiang Becik Polda Bali Ngamedalang 4 Pelayanan Publik Luput Saking Pungli
- 07 Mei 2021
- 22:05 WITA
- News
BADUNG, Balitopnews.com - Gubernur Bali, Wayan Koster ngajing becik Polda Bali sane sampun ngamedalang 4 Inovasi Pelayanan Publik minakadi, Inovasi Pelayanan Publik Samsat Kerti, Samsat Drive Thru Mobile, Samsat Drive Thru Ditlantas miwah Inovasi SKCK Drive Thru Dit Intelkam Polda Bali pinaka pangupaya ngcien rasa degdeg majeng krama ring tengahing Pandemi Covid-19.
"Tiang ngajiang becik pisan pidabdab puniki, saantukan dahat mabuat sajeroning nincapang pendapatan ring Provinsi Bali saha anut pisan sareng pabuat krama sane sampun katuekang olih Bapak Kapolri antuk tema Presisi (Prediktif, Responsibilitas, Transparansi, Berkeadilan, red) saha punika majanten sane kabuatang saantukan madue ayah-ayahan sane gelis, dangan saha luput saking Pungli (Pungutan liar, red), bersih, saha aman," baos Gubernur Koster ring ajeng Kapolda Bali, Irjen Putu Jayan Danu Putra, Kepala Ombudsman RI Perwakilan Bali, Umar Ibnu Alkhatab, Bupati Badung, Nyoman Giri Prasta, Kepala Badan Pendapatan Daerah Provinsi Bali, I Made Santha, Dirlantas Polda Bali, Kombes Pol. Indra, Direktur Utama Bank BPD Bali, I Nyoman Sudharma, miwah PT. Jasa Raharja Cabang Bali, Saniscara (7 Mei 2021) ring Kantor UPT. Samsat Badung.
Pecak Anggota DPR-RI 3 Periode saking Fraksi PDI Perjuangan puniki nlatarang Bali sane ngandelang pariwisata, sane mangkin banget ngrasayang pawesanaipun. Parindikan puniki karasayang antuk Kabupaten/Kota sane wit pendapatan ipun saking Pajak Hotel/Restaurant.
Nanging sangkaning kawentenan pamargi pamekas inovasi saking Polda Bali maprakanti sareng Badan Pendapatan Daerah Provinsi Bali, PT. Jasa Raharja, miwah BPD Bali, ring galahe punika Gubernur Koster nureksain wenten pawesana becik sane kaasilang saking kalih sumber utama Pendapatan Asli Daerah (PAD) ring Pemprov Bali (Pajak Kendaraan Bermotor dan Bea Balik Nama Kendaraan Bermotor, red) ring kahanan pandemi Covid-19.
"Pamargine puniki ngicen pawesana, mawinan ring Triwulan kapertama Warsa 2021 tiang sampun ngalinggatanganin Dana Bagi Hasil sane kepah ring Kabupaten/Kota sajebag Bali, saha sane pinih ageng ngamolihang Dana Bagi Hasil minakadi Kabupaten Badung Rp 26,5 miliar," baos Gubernur Pemprov Bali sane kasanggra becik saha ngelingang yening jinah arupiah kemanten dahat utama kawentenane.
Kapolda Bali, Irjen Putu Jayan Danu Putra nlatarang, pamargi pamekas Inovasi Pelayanan Publik Samsat Kerti, Samsat Drive Thru Mobile, Samsat Drive Thru Ditlantas wiadin Inovasi SKCK Drive Thru Dit Intelkam Polda Bali pinaka pangupaya ngaluputang kawentenan krama sane mapupul, nanging taler ngutamayang pendapatan daerah. Mawinan Polri kasarengin angga sane mapaiketan nglaksanayang pelayanan publik antuk nglaksanayang pamargi sapunapi mangda prasida kalaksanayang ring dija ugi saha antuk one top service.
Pinaka pamuput, Gubernur Bali kasarengin Kapolda Bali nyelagang galahnyane mabebaosan langsung sareng Polres Jembrana, Polres Buleleng, Polres Karangasem, Polres Gianyar, Polres Tabanan, Polres Bangli, Polres Klungkung, Polresta Denpasar, miwah Polres Badung melarapan antuk virtual , nyantenang langsung pamargin Inovasi Pelayanan Publik Samsat Kerti, Samsat Drive Thru Mobile, Samsat Drive Thru Ditlantas wiadin Inovasi SKCK Drive Thru Dit Intelkam Polda Bali.(gix)
Komentar