Pakeling World Environment Day, Wagub Cok Ace Nandur Terumbu Karang ring Tulamben
- 06 Juni 2021
- 21:06 WITA
- News
KARANGASEM, Balitopnews.com - Sajeroning pakeling Hari Lingkungan Hidup Sedunia (Wolrd Environment Day) sane kapakelingin satunggil tanggal 5 Juni, Wakil Gubernur Bali Tjokorda Oka Artha Ardhana Sukawati nyarengin parikrama adopsi miwah nandur terumbu karang sane kaulengang ring Pasisi Tulamben-Karangasem, rahina Redie (6 Juni 2021).
Wagub Cok Ace nguningayang rasa bangganyane majeng Pengurus Provinsi Persatuan Olah Raga Selam Seluruh Indonesia (PengProv POSSI) Bali. Manutnyane parikrama puniki anut sareng pangupaya nyaga kasucian kalih karahayuan jagat Bali nganutin daging Visi Program Pemerintah Provinsi Bali ”Nangun Sat Kerthi Loka Bali” melarapan Pola Pembangunan Semesta Berencana nyujur Bali Era Baru, pinaka masa sane kacihnayang antuk Bali sane Kawista, Bali sane Tata-Titi Tentram Kerta Raharja, miwah Gemah Ripah Lohjinawi.
Guru Besar ring ISI Denpasar puniki taler maosang yening Bali pinaka pulo sane alit majimbar 5.636,66 km2, antuk 9 kabupaten/kota, 57 kecamatan, 716 desa/kelurahan, miwah 1.493 desa adat, antuk akeh kramanipun 4,2 yuta diri. Bali selami puniki sampun kasub pinaka 'The Paradise of Indonesia' antuk kawentenan dresta kalih budaya sane nenten prasida kapanggihin ring wewidangan tiosan saha dahat ngadautin mawinan prasida dados genah wisata sane kasub ring jagate. Ekonomi ring Bali pamekas widang pariwisata taler kapatutang mangda nitenin widang perairan nganutin sareng adat wiadin budaya, sane ngawinang Bali “Metaksu/Mebhawa-Agung”.
Wagub Cok Ace taler maosang yening parikrama Adopsi miwah Nandur Terumbu Karang sane kapikamkam antuk PengProv POSSI Bali pinaka silih galah sajeroning nitenin kalestarian ekosistem terumbu karang, sapisanan nyokong ekonomi wisata bahari sane taler keni pawesana sangkaning Pandemi COVID-19.
“Antuk parikrama sane ngunggahang unteng Reimagine, Recreate, Restore, kaaptiang prasida dados silih tunggil parikrama sane prasida nyarengin nyayubin kawentenan jagate puniki, saha prasida nuldulin anak tiosan mangda nyaga kalestarian palemahan miwah ngawigunayang sumber daya berkelanjutan”, baosnyane.
Ketua Umum PengProv POSSI Bali Mayor Laut KH Bagus Partha Wijaya nguningayang yening parikrama puniki kalaksanayang, tiosan pinaka pangupaya nglestariang palemahan taler pinaka wentuk panyokong majeng sport tourism. Napi malih ring Provinsi Bali olahraga menyelam durung akeh sane nelebang, sangkaning punika Dane ngaptiang mangda melarapan antuk kawentenan POSSI Bali, krama Bali sayan akeh sane seneng sareng olahraga puniki.
Ring galahe punika katandur 200 bibit terumbu karang sane kapolihang saking Kelompok Pembudidayaan Karang Hias Nusantara (KPKHN) miwah Asosiasi Korek Kerang dan Ikan Hias Indonesia (AKKII). Sangkaning punika ring salanturnyane, Dane ngaptiang mangda parikrama puniki prasida nglantur mawinan kawentenan terumbu karang bawah laut ring Bali prasida becik kawentenane sane majanten prasida raris ngadautin kayun para wisatawan.
Ring parikrama punika, taler karauhin antuk Kepala Bank Indonesia Perwakilan Wilayah Bali, Kepala Ombudsman Perwakilan Bali, Ketua Bali Tourism Board wiadin uleman tiosan sane mapaiketan.(gix)
Komentar