Ngamedalang Langkungan Saking Rp 22,8 M Majeng Insentif Nakes, Sekda Dewa Indra Nampenin Gatra Yening Bali Nenten Alon Nyairang Dana Covid-19
- 19 Juli 2021
- 20:07 WITA
- News
DENPASAR, Balitopnews.com - Sekretaris Daerah Provinsi Bali, Dewa Made Indra nampenin indik gatra sane wenten ring makudang-kudang media, mapaiketan Menteri Dalam Negeri Tito Karnavian, ngicen teguran tertulis 19 provinsi sane kabaosang alon sajeroning pencairan dana Covid-19 ring daerah.
"Parindikan sane ngawinang Bali ngamolihang teguran saking surat punika minakadi Bali kabosang durung nglaksanayang pencairan insentif tenaga kesehatan sane ngarepin Covid-19, nanging tiang mastikayang yening Pemerintah provinsi Bali sampun ngamedalang dana pembayaran insentif majeng tenaga kesehatan kantos ring bulan Juni 2021,” baos Sekda Dewa Indra sajeroning keterangan persnyane, Soma (19 Juli 2021).
Sekda Dewa Indra taler nuekang yening realisasi pembayaran insentif nakes penanganan Covid-19 Provinsi Bali punika saking anggaran sane agengnyane Rp 47.017.500.000, sampun kamedalang kantos ring bulan Juni 2021 agengnyane Rp. 22.851.785.991 utawi persentase 48,60 persen.
“Mawinan yening madasar antuk realisasi punika provinsi Bali nenten sapatutnyane ngamolihang surat teguran saking Mendagri. Parindikan puniki taler sampun titiang uningayang melarapan antuk laporan tertulis majeng Menteri Keuangan miwah Menteri Dalam Negeri daweg tanggal 7 Juli 2021,” baosnyane.
Laporan punika,katlatarang Birokrat saking Pemaron, Kabupaten Buleleng puniki antuk tinas pisan nganinin indik realisasi dukungan pendanaan sajeroning Belanja Kesehatan penanganan pandemi Covid-19 wiadin belanja prioritas sane tiosan.
Sekda Dewa Indra, daweg Redite (18/7) wengine, taler sampun nguningayang ring Direktorat Jenderal Bina Keuangan Daerah mapaiketan sareng realisasi pencairan insentif nakes punika.
"Risampune kaselehin, kajantenang data sane kaanggen wantah data sane dumun saha nenten sane anyar ring bulan Juli 2021. Kawiaktiane kantos ring bulan Juni 2021 Provinsi Bali sampun kataur, saha ring bulan Juli majanten kantun proses,” Dane nuekang.
Sadurungnyane Menteri Dalam Negeri (Mendagri) Tito Karnavian maosang yening ngicen teguran tertulis majeng 19 kepala daerah. Wenten 19 provinsi minakadi, Provinsi Aceh, Sumatera Barat, Kepulauan Riau, Sumatera Selatan, Bengkulu, Kepulauan Bangka Belitung, Jawa Barat, Yogyakarta, Bali, Nusa Tenggara Barat. Kalanturang Kalimantan Barat, Kalimantan Tengah, Sulawesi Selatan, Sulawesi Tengah, Sulawesi Utara, Gorontalo, Maluku, Maluku Utara, miwah Papua. Provinsi Bali kabaosang durung nglaksanayang realisasi insentif tenaga kesehatan daerah (innakesda) sane mawit saking refocusing 8% DAU/DBH TA 2021 sane kaanggarang ring APBD TA 2021 sane agengnyane Rp 25 M.(gix)
Komentar