Gubernur Koster Nyelehin Vaksinasi Penyandang Disabilitas miwah ODGJ ring Desa Getakan
- 03 September 2021
- 21:09 WITA
- News
KLUNGKUNG, Balitopnews.com - Gubernur Bali, Wayan Koster nyelehin pamargin vaksinasi majeng Penyandang Disabilitas miwah ODGJ (Orang Dalam Gangguan Jiwa) ring Balai Dusun Getakan, Kecamatan Banjarangkan, Kabupaten Klungkung, Sukra (3 September 2021).
"Iraga patut bagia prasida ngamolihang vaksin Sinopharm pamekas majeng penyandang disabilitas sane kaicen langsung olih Presiden Joko Widodo melarapan Staf Khusus Kepresidenan. Sangkaning punika, majeng pamargin vaksinasi puniki patut prasida kapuputang ring panguntat bulan September 2021, saantukan vaksin Sinopharm jagi kadaluwarsa ring bulan Oktober 2021," baos Gubernur Bali sane kasarengin antuk Kepala Dinas Kesehatan Provinsi Bali, dr. Ketut Suarjaya, ring ajeng Bupati Klungkung, Nyoman Suwirta miwah Ketua TPP Kabupaten Klungkung, Ayu Suwirta.
Pangrauh Manggalaning Pemprov Bali puniki kakantenang kantos ngadautin kayun krama sane ngiringang silih tunggil kulawargannyane sane ngamolihang vaksin Sinopharm. Melarapan antuk Protokol Kesehatan sane ketat, Gubernur Koster mabebaosan langsung sareng penyandang disabilitas ring Desa Getakan saha ngicen semangat mangda prasida ngaatang angga.
Silih tunggil penyandang disabilitas sane kairing mabebaosan mapesengan I Made Sudiantara (36), ipun wantah keterbelakangan mental.
Ring panguntat parikrama, Gubernur Bali saking Desa Sembiran Buleleng puniki ngaptiang ring samian pamilet vaksinasi mangda setata disiplin nglaksanayang protokol kesehatan, silih tunggilnyane melarapan antuk nganggen masker.
“Tiang ngaptiang mangda setata disiplin nglaksanayang Prokes, mangda prasida luput saking kawentenan Covid-19,” baos Gubernur Bali sinambi nyukserahang wantuan paket sembako majeng
penyandang disabilitas sane mawit saking Otoritas Jasa Keuangan (OJK) Regional 8 Bali dan Nusa Tenggara serta PT. Pengadaian (Persero). Sadurungnyane, saking gatra sane kapolihang saking Kantor Desa Getakan yening sasaran vaksinasi majeng penyandang disabilitas puniki akehnyane 47 diri sane madue limang soroh cedangga utawi kecacatan, minakadi Cacat Tubuh wenten 20 diri, Cacat Mental 12 diri, Tuna Wicara 8 diri, Tuna Netra 6 diri miwah Bibir Sumbing adiri.
47 diri puniki akehan pinaka penyandang disabilitas sane produktif antuk swagina minakadi petani, karyawan swasta, pelajar, industri, buruh, pedagang miwah pensiunan.
Tiosan ring penyandang disabilitas sane ngamolihang vaksin Sinopharm, taler wenten adiri krama
ODGJ ring Desa Getakan sane ngamolihang vaksin.(gix)
Komentar