Wagub Cok Ace Ngajiang Becik Kanwil Kemenhumkam Bali Sajeroning Nreptiang WNA ring Bali

  • 06 September 2021
  • 23:09 WITA
  • News
Wagub Cok Ace Ngajiang Becik Kanwil Kemenhumkam Bali Sajeroning Nreptiang WNA ring Bali

DENPASAR,Balitopnews.com - Wakil Gubernur Bali Prof. Tjokorda Oka Artha Ardana Sukawati (Cok Ace) ngajiang becik pangupaya saking Kantor Wilayah Kementrian Hukum dan HAM Provinsi Bali mapaiketan ring pangrencana ngicen pamidanda utawi pengambilan tindakan majeng Warga Negara Asing (WNA) ring Bali. Parindikan punika kabaosang ri kala nyanggra audiensi saking Kantor Wilayah Kementrian Hukum dan Hak Asasi Manusia Bali sane kapucukin antuk Kepala Kantor Wilayah Jamaruli Manihuruk ring  ruang tamu Wakil Gubernur Bali, Kantor Gubernur, Soma (6/9). 

Ring galahe punika, Dane uning yening kantun akeh WNA sane mamurug ring prokes  saha parindikan punika prasida ngaonang citra Bali sane sedeng mautsaha nees panglimbak virus ring Bali. “Napi malih, Bali ring pungkuran puniki ngamolihang panampen becik saking pemerintah pusat saantukan prasida nedunang angka kasus wiadin angka kematian. Pamikolih becik punika sampunang kantos kakaonang sangkaning parilaksana jadma sane nenten patut,” baosnyane.

Guru Besar ISI Denpasar punika taler maosang, sampun majanten anggannyane melarapan antuk Satpol PP Pemprov Bali sering manggihin sane mamurug, sekadi WNA nenten nganggen masker ring genah umum napi malih wenten nglaksanayang parikrama ring ruangan tertutup antuk nenten nganggen masker. Manutnyane, anggannyane sampun nglaksanayang makudang-kudang pamidanda marupa pamidanda sanksi administratif kantos SWAB. “Nanging parindikan punika majanten kantun kirang, pamidanda sane agengan taler kalaksanayang antuk maprakanti sareng Kanwil Kemenkum HAM sekadi melarapan antuk deportasi,” baosnyane.

Mapaiketan ring pariwisata Bali, tokoh Puri Ubud sane sepisanan pinaka Ketua PHRI Bali maosang, kantun midabdabin skema essential travel. Dadosne WNA sane madue visa kerja prasida rauh langsung ke Bali. “Tiang saha angga uleng sapunapi para diplomat negara sahabat wiadin pengusaha rauh ke Bali. Yadiastun nenten ngicen pawesana sane ageng, nanging majanten jagi ngicen iyusan becik majeng hotel-hotel ring Bali,” baosnyane.

Kepala Kantor Wilayah Kementerian Hukum dan HAM Bali Jamaruli Manihuruk maosang yening  patemon puniki mapaiketan sareng pamargin operasi saking Kantor Wilayah Kementerian Hukum dan Hak Asasi Manusia Bali pamekas saking Kantor Imigrasi mapaiketan ring panureksan dokumen izin tinggal WNA sane selami puniki sampun kawantu antuk Satuan Polisi Pamong Praja (Satpol PP) Provinsi Bali inggian ring panureksan wiadin panreptian protokol kesehatan majeng WNA sane wenten ring Bali. "Mapaiketan ring punika angga ring Kantor Wilayah Kementerian Hukum dan Hak Asasi Manusia Bali ngaptiang panyokong saking Bapak Wakil Gubernur utaminipun saking Satpol PP Provinsi Bali mangda nglaksanayang operasi pengawasan orang asing sekadi operasi Protokol Kesehatan", baos Jamaruli.

Kakanwil Kemenkumham Bali, Jamaruli Manihuruk taler ngaptiang sokongan majeng Wakil Gubernur pinaka ketua PHRI Provinsi Bali mangda nyokong program saking Kantor Wilayah Kementerian Hukum dan HAM Bali. Mugi antuk sayan sering kalaksanayang operasi pengawasan WNA wiadin protokol kesehatan, krama jagi sayan trepti mawinan kahanan kaon sekadi mangkin prasida sayan becik miwah pariwisata Bali prasida mawali sekadi jati mula, napi sane karencanayang sadurungnyane, wisatawan rauh ke Bali prasida kakardinin.

Audiensi taler karauhin antuk Kepala Satuan Polisi Pamong Praja Provinsi Bali Dewa Nyoman Rai Dharmadi, Kepala Dinas Pariwisata Provinsi Bali I Putu Astawa, Kepala Divisi Keimigrasian Amrizal miwah Kepala Kantor Imigrasi Kelas I Khusus TPI Ngurah Rai Surya Mataram. (Gix)


TAGS :

Komentar