Wagub Cok Ace Ngajiang Pisan Parikrama Vaksinasi Polsek Dentim miwah BVD 

  • 11 September 2021
  • 20:09 WITA
  • News
Wagub Cok Ace Ngajiang Pisan Parikrama Vaksinasi Polsek Dentim miwah BVD 

 

DENPASAR, Balitopnews.com - Wakil Gubernur Bali Tjokorda Oka Artha Ardhana Sukawati, Saniscara (11 September 2021) nyelehin pamargin vaksinasi Covid-19 sane kapikamkam antuk polsek Denpasar Timur sareng Bali Volkswagen Devision (BVD), ring Sekar Jambu-Denpasar. 

Ring galahe punika, Wagub Cok Ace ngaturang suksma majeng polsek Dentim wiadin BVD sane sampun ngwantu pemerintah sajeroning nglaksanayang vaksinasi. Tjok Ace ngaptiang sayan akeh pangrembe saking makudang-kudang angga sajeroning nglaksanayang vaksinasi, mawinan pamargin vaksinasi paletan kapertama wiadin kaping kalih digelis puput. 

“Antuk manyama braya saling tulung, majanten jagi prasida kakardinin napi sane kaaptiang, saha mugi-mugi Bali prasida digelis mawali sakadi jati mula saha ekonomi prasida kauripang malih sekadi sadurungnyane”, baosnyane. 

Cok Ace maosang rauhing ring rahina Sukra 10 September 2021, akeh vaksin sane sampun kadistribusiang 5.765.894, majeng vaksin kapertama sampun 108,12%, vaksin ka-2 sampun kantos 72.38% saha vaksin ka-3 majeng tenaga kesehatan sampun ring 72.68%.

“Vaksinasi ring samian Kabupaten/Kota ring Bali majanten kantun kamargiang, mangda sami prasida puput”, baos Cok Ace.

Tiosan punika, Wagub Cok Ace ri kala ngesengin para pamilet vaksin, ngelingang mangda setata nguratiang protokol kesehatan, yadiastun sampun ngamolihang vaksin kapertama wiadin sane kaping kalih. 

Manutnyane vaksin nenten mapiteges jagi nenten prasida keni Covid-19, nanging vaksin  prasida nincapang sistem imun sane wenten ring angga sarira. Sangkaning punika, Wagub Cok Ace ngaptiang ring krama mangda setata nguratiang becik protokol kesehatan, ring dija ja magenah wiadin malelungan. (gix)


TAGS :

Komentar