Topeng Patih, Cendera Mata saking Wagub Cok Ace majeng Ketua Pengadilan Tinggi Bali Sane Sampun Puput Masa Tugas
- 16 September 2021
- 21:09 WITA
- News
DENPASAR, Balitopnews.com - Pinaka rasa suksmaning manah antuk swadarmannyane selami puniki majeng Zaid Umar Bobsaid pinaka Ketua Pengadilan Tinggi Bali, Wakil Gubernur Bali Tjokorda Oka Artha Ardana Sukawati utawi ketah kabaosang Cok Ace, ngicen cendera mata marupa Topeng Patih.
Cendera mata kasukserahang ri kala Zaid Umar Bobsaid mapamit ring Wagub Cok Ace, ring ruang Wakil Gubernur Bali, Denpasar, Wraspati (16 September 2021).
Guru Besar ISI Denpasar punika maosang yening Topeng Patih madue semerti pinaka simbul kekuatan utawi kapagehan. “Melarapan antuk puniki tiang ngaptiang mangda Bapak prasida setata kukuh miwah pageh melanin keadalilan ri kala nglaksanayang swadarma,” baosnyane.
Dane taler ngaturang suksma antuk prakantinyane selami puniki. Amongannyane sane mapaiketan sareng niwakang pamutus, majanten jagi mapaiketan sareng katreptian jagat Bali.
“Tiang ngaptiang puniki nenten pinaka patemon kaping untat, miwah prasida kacunduk malih ring galah tiosan,” baosnyane.
Zaid Umar Bobsaid maosang yening pengalaman pinaka Kepala Pengadilan Tinggi ring Bali wantah pinaka pengalaman sane dahat becik.
“Tiang prasida nyantenang kaluihan palemahan wiadin kabudayan ring Bali sane masikian sareng kahuripannyane sarahina,” baosnyane.
Dane taler ngaptiang mangda pakilitan becik setata kakardinin, yadiastun Dane jagi ngawitin swadarmannyane ring genah anyar ring Surabaya, Jawa Timur ring awuku sane jagi rauh.
"Pangaptin tiange mangda pandemi digelis matilar saha krama Bali prasida mawali sakadi jati mula miwah pariwisata taler prasida sekadi dumun,” baosnyane.(gix)
Komentar