Ring Ajeng Komisi II DPR RI, Gubernur Koster Nguningayang Kasiagayan Bali Mungkah Pariwisata Internasional

  • 11 Oktober 2021
  • 18:10 WITA
  • News
Gubernur Koster ri kala nyanggra Kunjungan Kerja Komisi II DPR RI sajeroning Reses, ring Wiswa Sabha Kantor Gubernur Bali, Soma (11 Oktober 2021).

 

DENPASAR, Balitopnews.com - Gubernur Bali Wayan Koster maosang, panglimbak kawentenan Covid-19 ring Provinsi Bali majanten sampun sayan ngareredang. Kasus harian wenten ring angka kalih digit utawi kirangan ring satus.

"Kawentenane setata nedunang selami tigang wuku puniki," baos Gubernur Koster ri kala nyanggra Kunjungan Kerja Komisi II DPR RI sajeroning Reses, ring Wiswa Sabha Kantor Gubernur Bali, Soma (11 Oktober 2021).

Manut Koster parindikan puniki sampun sayan becik, pamargin 3T sampun becik, positif rate taler 1 persen. Pamargin prokes taler sampun kamargiang becik,  napi malih kawentenan krama sane ngawigunayang masker ring Provinsi Bali pinih ageng ring Indonesia.

Mapaiketan ring pamargin vaksinasi, saking 4,3 yuta krama, sampun wenten 3,3 yuta nglaksanayang vaksin paletan kapertama miwah 80 persen sampun nglaksanayang suntik vaksin paletan kaping kalih. Parikrama saking kramane taler sampun kaicen sajeroning nangiang widang ekonomi. 

"Dados ngranjing ka mall yening sampun ka vaksin. Hotel sampun standar CHSE, mawinan ring tanggal 14 Oktober sane jagi rauh penerbangan internasional sampun ngawit kabungkah," baosnyane ring ajeng ketua Komisi II DPR RI Ahmad Doli Kurnia Tanjung.

Koster taler ngawewehin, 7.000 diri wisatawan domestik satunggil rahina rauh melarapan antuk udara ngaruruh Bali. Work from Bali taler kalaksanayang antuk makudang kementerian, mawinan tingkat hunian hotel wenten sane kadagingin kantos 30 persen. Majeng pamargin parikrama internasional, Bali sampun midabdabin angga sekadi pinaka tuan rumah parikrama  G-20 warsa 2022.(gix)


TAGS :

Komentar