Bali Tuan Rumah TB Summit 2021, Sekda Dewa Indra Nguningayang Kesembuhan Kasus TBC 90%
- 20 Oktober 2021
- 22:10 WITA
- News
BADUNG, Balitopnews.com - Sekretaris Daerah Provinsi Bali Dewa Made Indra ngaturang suksma pisan antuk kapercayan Kementerian Kesehatan RI, mawinan Bali dados tuan rumah pamargin Tuberculosis Summit 2021, sane kalaksanayang ngawit tanggal 20-23 Oktober ring The Stones Hotel-Kuta.
Sekda Dewa Indra maosang mapaiketan ring kasus TBC ring Bali, data September 2021 kalikita yening kasus TBC aktif ring bali wenten 1.963 kasus, antuk tingkat kesembuhan kantos 90%.
“Parindikan puniki pinaka utsaha samian angga, napi malih karembe rauhing ring kader sane wenten ring padesanan. Tiang banget ngaturang suksma antuk utsaha wiadin pangremba samian angga salami puniki. Nanging mangda prasida ngardi kasus zero persen kabuatang utsaha sane sayan ageng. Malarapan punika, eliminasi TB warsa 2030 sane kapikamkam Bapak Presiden prasida kakardinin," baosnyane.
Dewa Indra ngaptiang Bali prasida ngicen iyusan becik majeng pamargin TB Summit puniki. Melarapan antuk punika, patemon puniki prasida ngawetuang rerincikan kalih pamutus sane kabuatang sajeroning ngarepin kasus TB sane wenten ring Indonesia.
Wakil Menteri Kesehatan Dante Saksono Harbuwono maosang TBC pinaka pinyungkan sane sampun wenten ngawit abad ka-8. Sajeroning ngaluputang kawentenan TBC, Pemerintah Indonesia madue program eliminasi TB ring warsa 2030. Sajeroning ngardi parindikane punika, Wamen Dante Saksono, nlatarang yening kabuatang pangremba saking samian angga, inggian Kemenkes, Kemendagri, Pemerintah Daerah rauhing ring para kader sane wenten ring padesanan sajeroning nglaksanayang parindikan inovatif mangda prasida ngaluputang kasus TB.
"Ring kasus Covid-19 wenten pidabdab nglaksanayang tracing, punika taler TBC majanten kawentenan tracing majeng kontak erat mabuat kalaksanayang pinaka pangupaya nambakin kawentenan kasus. Tiosan punika, tracing kontak erat taler kabuatang sajeroning nyelehin kawentenan kasus anyar TB sane durung kapanggihin," baosnyane.(gix)
Komentar