Gatra Becik, Samian Desa/Kelurahan ring Kota Denpasar Ngranjing Zona Hijau
- 23 November 2021
- 17:11 WITA
- News
DENPASAR, Balitopnews.com - Mawit rahina Soma (22 November 2021), samian desa/kelurahan ring Kota Denpasar ngranjing Zona Hijau, kawilangin saking pangawit pandemi sane sampun nibenin sawetara selami kalih warsa pungkuran puniki.
Parindikan punika kabaosang Walikota Denpasar IGN Jaya Negara ri kala kapanggihin ring selagan pamargin Sidang Paripurna DPRD Kota Denpasar, ring Gedung DPRD Kota Denpasar, Anggara (23 November 2021).
Walikota Denpasar Jaya Negara maosang sane mangkin kawentenan kasus aktif Covid-19 ring Kota Denpasar wantah kantun kalih likur diri utawi sawetara 0,06 persen, antuk tingkat kematian agengnyane 2,6 persen miwah 97,3 persen majeng tingkat kesembuhan pasien Covid-19.
"Yadiastun asapunika, iraga sareng sami mangda setata waspada napi malih nyanggra pamargin Natal wiadin wanti warsa anyar. Kahanan sane sampun becik puniki patut katitenin mangda nenten kaon malih," baosnyane.
Yening tureksain kawentenane ring makudang panegara sekadi Eropa miwah Selandia Baru, Jaya Negara maosang yening sane mangkin ring makudang panegara kantun kamargiang lockdown.
"Tiang ngaptiang panyokong saking para anggota dewan sane banget mustikayang titiang mangda prasida nyaga kahanan sane sampun becik puniki, pangaptine mangda pariwisata ring Bali prasida mawali sekadi jati mula, utaminipun ring Kota Denpasar," baosnyane.
Patut kauningin yening ring Kota Denpasar wenten 43 Desa/Kelurahan sane ring galahe mangkin sampun wenten ring zona hijau kawentenan Covid-19.(gix)
Komentar