Gubernur Koster Nyokong Pakilitan BNN, KPK miwah BNPT ngarepin Narkoba, Korupsi miwah Terorisme

  • 24 November 2021
  • 23:11 WITA
  • News
Kepala Badan Narkotika Nasional (BNN) RI, Komjen. Pol. Petrus Reinhard Golose, Ketua Komisi Pemberantasan Korupsi (KPK) Komjen. Pol. Firli Bahuri, miwah Kepala Badan Nasional Penanggulangan Terorisme (BNPT), Komjen. Pol. Boy Rafli Amar

DENPASAR, Balitopnews.com - Gubernur Bali Wayan Koster munggah pinaka narawakya utama sajeroning acara pangawit diskusi panel sane karauhin langsung olih narawakya, Kepala Badan Narkotika Nasional (BNN) RI, Komjen. Pol. Petrus Reinhard Golose, Ketua Komisi Pemberantasan Korupsi (KPK) Komjen. Pol. Firli Bahuri, miwah Kepala Badan Nasional Penanggulangan Terorisme (BNPT), Komjen. Pol. Boy Rafli Amar sane ngunggahang unteng Masikian Ngarepin Narkoba, Korupsi miwah Terorisme Sajeroning Pewangunan SDM Unggul ring Era VUCA. 

 

Pamargin diskusi panel sane kalaksanayang melarapan antuk Blended Webinar puniki kalaksanayang ring Gedung PRG Polda Bali, Buda ( 24 Nopember 2021) sane karauhin olih Sekda Provinsi Bali, Dewa Made Indra, Kodam IX/Udayana, Kapolda Bali, Irjen. Pol. Putu Jayan Danu Putra miwah samian Bupati/Walikota Sajebag Bali, Kejaksaan Negeri Sajebag Bali, Kapolres Sajebag Bali, miwah Komandan Kodim Sajebag Bali.

 

Koster ngicen sokongan majeng pamargin diskusi panel sane nyikiang samian angga sajeroning ngarepin Narkoba, Korupsi wiadin Terorisme puniki. Sangkaning punika, Gubernur Bali ngaptiang parikrama puniki sane kapikamkam BNN, KPK miwah BNPT saha kapertama kalaksanayang ring Indonesia antuk ngambil genah ring Bali, prasida kalanturang ring wewidangan tiosan.

 

Mapaiketan ring Narkoba, Gubernur Bali saking Desa Sembiran, Buleleng puniki maosang yening Narkoba ring galahe mangkin sampun ngranjing ring padesanan. Ring masa pandemi, kawentenan kasus narkoba kajantenang nincap saha Indonesia ring galahe mangkin nenten pinaka genah transit wiadin konsumen kemanten, nanging sampun dados produsen. 

 

"Penyalahgunaan narkoba tiosan ngaonang masa depan para yowana, nanging taler dados wiwilan kawentenan kriminalitas, sane prasida mialangin pewangunan nasional," baosnyane.

 

Mapaiketan ring Korupsi, Gubernur Bali lulusan ITB puniki maosang, agengnyane kasus korupsi prasida ngawetuang degradasi moral sane majanten mawesana kaon majeng panegara. Parindikan punika kacihnayang antuk kerugian negara sane kantos Rp 56,7 triliun miwah kasus suap kantos Rp 322 miliar. Pawilangane punika pateh sareng 3.000 (bangunan,red) puskesmas miwah 1.750 sekolah dasar.

 

Mapaiketan ring Terorisme, pecak Anggota DPR-RI 3 Periode saking Fraksi PDI Perjuangan puniki maosang, pikobet terorisme sampun dados gageem samian angga, kantos ngawetuang rasa osah sane ngaonang katreptian, napi malih prasida ngicen gageem majeng ideologi negara, ngaonang panglimbak ekonomi wiadin pawesana kaon sane tiosan. 

 

"Sangkaning punika, parikrama puniki kaaptiang mangda prasida nedunang pawesana kaon sane kaawinang sangkaning terorisme, melarapan antuk maprakanti sareng BNN, KPK wiadin BNPT. Sane taler mabuat, parindikan puniki utama kawentenane sajeroning nyokong pewangunan Bali wiadin Indonesia," baosnyane.

 

 

Kapolda Bali Irjen. Pol. Putu Jayan Danu Putra maosang, parikrama puniki ngrauhang narawakya sane sayuwakti uning ring widang Narkoba, Korupsi, wiadin Terorisme, saha kaaptiang prasida nyokong pangupaya preventif wiadin holistik sajeroning ngarepin pikobet ageng ring Indonesia. 

Napi malih ring galahe mangkin kejahatan terorganisir sampun ngawigunayang teknologi digital, mawinan kabuatang SDM sane sayuwakti andel ngarepin parindikan punika.

 

"Puniki pangupaya mangda Indonesia luput saking narkoba, korupsi wiadin teroris mawinan prasida ngardi para yowana sane andel antuk parilaksana becik nyujur Indonesia Maju," baosnyane.

 

Kepala BNN RI Komjen. Pol. Petrus R Golose sane ngamolihang galah kapertama maosang yening Indonesia pinaka pasar potensial peredaran gelap narkoba antuk persentase pengguna kantos 1.8 persen utawi 3.4 yuta diri. Ulung dasa persen narkoba ngranjing melarapan jalur laut sane meweh katureksaian saantukan radar sane kaanggen kapademang.

 

"VUCA sane dados pahan saking pamargin parikrama puniki taler kabaosang pinaka singkatan saking Volatility, Uncertainty, Complexity, miwah Ambiguity. VUCA pitegesyane jagate puniki mauwah gelis pisan, tan pasangkan saha wenten akeh parindikan sane ngicen pawesana majeng jagate puniki, antuk kebenaran wiadin realitas dadosne subyektif pisan. Sane ngicen pawesana ageng pisan wantah panglimbak teknologi," baos Golose.


 

Ketua KPK Komjen. Pol. Firli Bahuri maosang korupsi pinaka kejahatan kemanusiaan sane nenten wantah ngaonang Hak Asasi Manusia, nanging taler prasida mawesana kaon majeng ekonomi Bangsa. 

 

"Samian angga patut nyarengin ngarembe nees kawentenan korupsi. Samian angga mangda prasida dados pelaku sejarah sajeroning ngaluputang kawentenan korupsi," baosnyane.

 

Kepala BNPT, Komjen. Pol. Boy Rafli Amar  maosang ideologi sesat terorisme ngawigunayang kekerasan mangda pangapti miwah tetujonnyane kadagingin miwah manados ideologi sane anti demokrasi, anti kemanusiaan saha intoleran. 

 

"Jagi sayan ageng baya ipun yening ideologi terorisme miwah radikalisme sane mawit saking dura negara karanjingang ring Indonesia madasar antuk ajah-ajah agama sane prasida dados doktrin majeng krama. 

Tetujon teroris wantah ngrusak panegara, mawinan tiang nyarengang samian yowana saha samian angga mangda setata nyobyahang miwah nguningayang indik sejarah bangsa Indonesia. Maka papat konsensus negara sane kacumpuin sareng sami, nenten dados malih kaubat-abit malih sangkaning kawentenan ideologi sane tiosan," Dane nuekang.

 

Ring panguntat parikrama, Gubernur Koster nyukserahang cinderamata marupa Kain Tenun Endek Bali majeng Kepala BNN RI, Komjen. Pol. Petrus Reinhard Golose, Ketua KPK, Komjen. Pol. Firli Bahuri, miwah Kepala BNPT, Komjen. Pol. Boy Rafli Amar.(gix). 

 


TAGS :

Komentar