Jepang Kabungkah, LPK DARMA STIKOM Bali Group nglepas 66 Pamilet
- 18 Maret 2022
- 22:03 WITA
- News
Magang Testimoni Dian Anggasari: Sangu Magang Selae Yuta Asasih
DENPASAR,Balitopnews.com – Kawentenan pandemi Covid – 19 sane kawentenane nedunang ring Jepang wiadin Indonesia mungkah selah ring pengiriman pamilet magang. Ring rahina Sukra (18 Maret 2022) puniki, LPK DARMA STIKOM Bali Group nglepas 66 pamilet magang ka Jepang, magenah ring kampus ITB STIKOM Bali, Renon, Denpasar.
“Iraga patut angayu bagia, risampune pandemi sampun sayan nilarin, Pemerintah Jepang mawali mungkah visa magang mawinan mahasisya sane sampun suwe lulus, wengine malih jebos prasida magang. Rombongan kapertama wengine malih jebos wenten siya likur diri, raris ring 20 Maret wenten kalih diri, 14 April wenten kalih diri, 11 Mei wenten nem likur diri, miwah ring tanggal 01 Juni wenten 7 diri. Samian wenten 66 diri sane ngamiletin magang,” baos Dr. Dadang Hermawan, Direktur Utama LPK DARMA, sane taler pinaka Rektor ITB STIKOM Bali.
Dadang Hermawan nlatarang, saking LPK DARMA STIKOM Bali Group ngwangun prakanti sareng Sento Cooperative Kiyoto Warsa 2018 sajeroning magang ring Jepang, sampun wenten 216 pamilet magang sane kakirim ring makudang perusahaan ring Jepang. “Akehan sampun puput magang salai tigang warsa nanging akeh pamilet nenten kayun mawali ka Indonesia, nanging langsung ngurus visa tokuteiginou utawi visa kerja mawinan pamikolihnyane sayan ageng. Saking 216 diri punika, selikur diri pinaka mahasiswa ITB STIKOM Bali,” baos Dadang Hermawan.
Manutnyane, saking dumun pamargin perekrutan wiadin pengiriman nenten naenin manggihin pikobet. Nanging ri kala pandemi Covid – 19 nibenin jagate, pengiriman kaandegang. “Sane mangkin para sisya sane sampun tamat pelatihan nanging durung ngamolihang penempatan wenten 304 diri, minakadi 184 sane lanang miwah 120 diri sane istri, " baos Dadang.
Dane nlatarang, LPK DARMA STIKOM Bali Group madue tigang pamargi rikala pemberangkatan ka Jepang. Tiosan malarapan antuk visa magang utawi Jisshusei, taler mrasidayang nganggen visa kerja Specified Sikll Worker utawi Tokutei Ginou antuk pamikolih sane agengan. Pamargi pinih untat malarapan Student Visa utawi Visa Pelajar. “Puniki danganan, saantukan wantah muatang sertifikat kursus Bahasa Jepang salai 320 jam, kapidabdabin langsung mangda prasida ka Jepang. Sane mangkin sampun wenten 18 mahasiswa sane kaproses jagi ka Jepang. Petang diri jagi berangkat ring bulan Juni 2022 miwah 14 diri berangkat ring bulan September 2022. Irika para mahasiswa jagi malajah basa Jepang ring akademi irika salami awarsa langkung sia sasih sinabi magang magang kerja malarapan sistem arubaito utawi part time. Progam puniki jagi nenten mialangin kuliahnyane ring STIKOM Bali saantukan anut sareng program Merdeka Belajar Kampus Merdeka Kemendikbud RI. Yadiastun makarya part time nanging sangu sane kaicen pateh sakadi pamikolih magang," baos Dadang Hermawan.
Direktur LPK DARMA Drs. Dede Heryadhy ngawewehin, sapatutnyane sane prasida terbang wengine malih jebos wenten 29 diri, nanging wenten adiri sane nenten nyarengin saantukan test PCRnyane positif. “Gatra puniki wau kauningin wengine miwah taler sampun kauningayang majeng pamilet wiadin yayah rena ipun. Titiang nguningayang langsung ring angga sane wenten ring Jepang saha nganikain mangda ipun karantina dumun awuku, risampune test PCR pamikolihnyane negatif, prasida raris ka Jepang,” baos Dede Heryadhy.
“Titiang mapangapti ring samian sane berangkat, sampune rauh ring Jepang, setata ngaatang angga majeng sawitrannyane sane durung berangkat,” baosnyane.
Ring galahe punika, Dadang Hermawan miwah Dede Heryadhy nyarengang silih tunggil alumni pamilet magang minakadi Dian Anggasari saking Abiansemal, Kabupaten Badung, Bali. Dian Anggasari ngangkenin salai tigang warsa ring perusahaan ayam petelur ring Kiyoto, ipun ngamolihang sangu kotor sawetara selae yuta asasih. “Risampune kakirangan aparto (apartmen-red), sisannyane wenten kalih dasa yuta. Satunggil sasih tiang ngirim Rp 15 yuta ka Bali, sisanyane kaanggen sangu irika,” baos Dian Anggsari.
Ipun ngangkenin, yadiastun sampun polih kursus basa Jepang salami petang sasih, nanging ri kala wau rauh ring Jepang, kantun meweh mabebaosan utaminipun mapaiketan sareng pikaryannyane sane anyar punika. “Nanging risampune tigang sasih, wau prasida antar. Sane mabuat, wantah mangda setata malajahang dewek ri kala mabebaosan, sampunang meneng wiadin kimud,” piteketnyane.
Manut Dadang Hermawan, Dian Anggasari pinaka pamilet magang sane mawit saking krama umum. Yening ipun pinaka mahasiswa ITB STIKOM Bali, majanten ipun jagi sayan akeh ngamolihang pengalaman. “Kapertama, ipun prasida nglanturang malih kuliah miwah ngamolihang gelar sarjana, ngamolihang pengalaman kerja, madue kawagedan basa Jepang sane becik miwah jinah sane kapolihang sayan akeh. Yening ngasasih ngirim limolas yuta ka Bali, salai tigang warsa majanten pamikolih ipun Rp 450 juta.
Kepala Dinas Ketenagakerjaan Enegeri dan Sumber Daya Mineral Provinsi Bali Drs. Ida Bagus Ngurah Arda, M.Si sajeroning sambrama wacanannyane sane kawacen olih Kepala UPTD Balai Hygiene Perusahaan dan Kesehatan Kerja (Hyperkes) Dewa Putu Alit, ST, M.Kes, ngelingang ring para pailet mangda prasida makta raga, ngwangiang padewekan, kulawarga, wangsa wiadin ngwangiang Bali; anggen galah magang salami tigang warsa sabecik-beciknyane; sampunang kantos kagoda kantos lempas saking program pemagangan; kesehatan mangda kauratian sangkaning matiosan musim sane wenten irika miwah antuk setata nguratiang prokes.
“Tigang dasa warsa dados PNS, gaji tiang paling ageng nem yuta. Ring Jepang, sakadi pamilet magang iwau, gajinyane kantos Rp 25 yuta. Punika majanten ageng, saha mangda prasida dados conto majeng mahasiswa sane jagi berangkat wengine malih jebos,” baos Dewa Putu Alit. (rsn)
Komentar