Nyanggra Wanti Warsa ka-4, Flobamora Tabanan Ngresikang Leluu ring DTW Tanah Lot
- 20 Maret 2022
- 18:03 WITA
- News
TABANAN, Balitopnews.com - Nyanggra wanti warsa ka- 4, Flobamora Tabanan nglaksanayang bakti sosial, mareresik ring Pura Tanah Lot Tabanan. Parikrama mareresik luu punika taler nyarengang organisasi masyarakat sane tiosan, sakadi Ikawangi, Pasundan, Jagasatru, Keris Bali, miwah Forum Bhineka Tunggal Eka.
“Parikrama kadagingin antuk ngresikang leluu. Kawiaktiannyane taler wenten pangrencana donor darah, nanging durung kaicen mawinan jagi kalaksanayang ring genah wiadin galah sane matiosan,” baos Paskalis Boli, Ketua Flobamora Tabanan, Redite (20 Maret 2022)
Pucak pakeling wanti warsa ring rahina Sukra tanggal 8 April 2022. “Katarka jagi mundur ring tanggal 10 April,” baosnyane. Manutnyane, Flobamora Tabanan wantah paingkupan krama sane embas ring Nusa Tenggara Timur, nanging jenek ring Tabanan. “Titiang sami majanten nyokong pemerintah sajeroning ngwangun Tabanan,” baosnyane.
"Akeh anggota ring Tabanan, baosnyane wenten 462 diri sane wenten ring data anggota. “Sane durung kaunggahang irika majanten kantun akeh,” pawewehnyane.
Dane ngawewehin, Flobamora Tabanan sering pisan nglaksanayang parikrama sosial. Ri kala pandemi Covid-19, taler ngicen wantuan marupa sembako. “Ri kala wenten longsor ring ungkur asrama Rindam, taler ngwantu nglaksanayang gotong royong, ngwantu krama,” baosnyane.
Dane nlatarang, Flobamora Tabanan ring soang-soang kecamatan taler madue sub koordinator. “Pembinaan majanten satata kalaksanayang majeng anggota Flobamora,” baosnyane. (Md/rls)
Komentar