Ketua Dekranasda Provinsi Bali Ngajiang Becik Festival Nusantara ring Garuda Wisnu Kencana
- 14 Agustus 2022
- 18:08 WITA
- News
ADUNG, Balitopnews.com - Ketua Dewan Kerajinan Nasional Daerah (Dekranasda) Prov Bali Ny. Putri Koster ngajiang becik pamargin Festival Nusantara sane ring acara pamungkahnyane misuguhang Lomba Baleganjur ring Garuda Wisnu Kencana Cultural Park (GWK), Badung, daweg rahina Redite Paing Wuku Matal tanggal 14 Agustus 2022 .
Pamargin Festival Nusantara puniki, manutnyane pinaka rasa suksmaning idep, riantukan ring kalih warsa pungkuran puniki, Bali banget kaon sangkaning pandemi Covid-19 rumasuk nibenin samian wewidangan ring jagate. “Sane mangkin Covid-19 ring Bali sampun ngareredang, Bali sayan ramia antuk kawentenan wisatawan. Puniki pinaka galah sane becik majeng para seniman sajeroning makarya reriptan seni, prasida nyihnayang kawikanan widang seni majeng jagate,” baosnyane. Ring galahe punika Dane taler kasarengin olih Kepala Dinas Perindustrian dan Perdagangan Provinsi Bali I Wayan Jarta.
Yening ring acara pamungkah karamianin antuk pamisuguhan Baleganjur saking para pegawe GWK, Dane taler ngajiang kawentenan pegawe irika sane sampun misuguhang tontonan sane dahat becik. “Majanten nenten dangan ngepah galah makarya sinambi latihan, mawinan Titiang dahat ngajiang utsaha saking panabuh,” pawewehnyane.
Dane taler mapakeling, ring satunggil festival sane kalaksanayang GWK pamekas Festival tari mangda setata nguratiang soroh igel-igelan sane kapisuguhang ring Bali. Sakadi sane kauningin, sesolahan ring Bali kakepah dados tetiga minakadi sesolahan Wali, Bebali miwah Balih-Balihan. Sesolahan Wali wantah sesolahan pingit sane kapisuguhang ri kala upacara agama, sesolahan Bebali pinaka sesolahan semi sakral sane prasida kasolahang ri kala upacara agama wiadin ri kala wenten pertunjukan, miwah pinih untat sesolahan Balih-Balihan sane pinaka sesolahan pertunjukan. “Cutetnyane sampunang kantos awor maka tiga, sampunang nyolahang sesolahan Wali ri kala Festival, saantukan punika pinaka taksu Bali,” Dane nuekang mangda Bali sampunang kantos kaicalan taksu, saantukan prasida ngicalang jati diri Bali sane pinaka wit pangurip pariwisata salami puniki.
Ring galahe punika, anak istri sane kasub pinaka seniman serba bisa taler maosang yening Bali kasub sangkaning budaya ipun, budaya sane ngawinang pariwisata maju. Dane taler nuekang Pariwisata punika kabuatang majeng budaya, nenten budaya majeng pariwisata. Mawinan pariwisata patut wenten kontribusi sane ageng majeng panglimbak miwah kalestarian budaya.
Ny. Putri Koster taler ngaturang swasti prapta majeng para seniman sane mawit saking dura Bali. Dane ngaptiang malarapan antuk kawentenan Festival puniki ring Bali prasida nyobyahang Bali wiadin Provinsi tiosan ring ajeng dunia. Napi malih ring salanturnyane Dane maosang Gubernur Bali Wayan Koster kantun midabdabin Pusat Kebudayaan Bali ring Klungkung, sane manados pusat kebudayaan ring Bali. “Ngiring ngawit mangkin para seniman wiadin IKM/UMKM maparidabdab, saantukan Pemprov Bali antuk kapamucukan Gubernur Wayan Koster sampun midabdabin genah. Iraga prasida ngawigunayang genahe punika,” baosnyane.
Direktur GWK Erwyanto Tedjakusuma sadurungnyane taler nlatarayang yening Festival Nusantara puniki matetujon ngramianin pakeling wanti warsa RI miwah wanti warsa Provinsi Bali. Parikrama jagi kalaksanayang saking tanggal 14-21 Agustus 2022. Dane taler maosang yening acara puniki nyarengang sawetara 100 UMKM sane kakemas ring Program PASAR KULINER NUSANTARA. Pinaka parikrama puncak, jagi kalaksanayang PENTAS NUSANTARA ring Tanggal 17 Agustus galah 19.00 Wita sane ngrauhang Artis Nasional mategepan antuk Pesta Kembang Api.
Dudonana acarannyane minakadi ring tanggal 14 Agustus 2022 kalaksanayang Lomba Baleganjur Kolosal, Upacara Peringatan 17 Agustus kadagingin upacara bendera sane ngulemin 200 diri sisia sekolah miwah 100 karyawan GWK. Majeng parikrama nyabran rahina kadagingin Pasar Kuliner Nusantara antuk ngrauhang 100 kuliner nusantara.(Rls/Btnc)
Komentar