Nglepas Kirab Merah Putih MBPS, Wagub Cok Ace Nuekang Semangat Persatuan
- 13 Agustus 2022
- 19:08 WITA
- News
DENPASAR, Balitopnews.com - Wakil Gubernur Bali Prof.Tjokorda Oka Artha Ardana Sukawati nglepas Kirab Merah Putih sane kalaksanayang olih Badan Musyawarah Perguruan Swasta (BMPS) Provinsi Bali, ring ajeng Kantor Gubernur Bali, Renon, Denpasar, rahina Saniscara Umanis Wuku Medangkungan, tanggal 13 Agustus 2022.
Ring sambrama wacanannyane, Wagub Bali ngajiang becik pamargin parikrama semenge punika sajeroning pakeling wanti warsa Pemprov Bali ka-64 miwah wanti warsa NKRI ka-77. Wagub Bali maosang, salami kalih warsa langkung, sareng-sareng nglintangin masa pandemi, yadiastun rauh mangkin durung janten ical. Ekonomi Bali kaon pisan sangkaning pandemi, mangda prasida katangiang malih majanten samian patut masikian, sareng-sareng ngaremba mangda sayan becik.
"Ekonomi Bali dahat kakaonang sangkaning katiben pandemi, sangkaning punika iraga sareng sami mangda masikian, sareng-sareng ngaremba, mangda sayan gelis katangiang saha sayan rajeg kawentenannyane,” pawewehnyane.
Wagub Cok Ace ngawewehin, yening dumun sadurung mahardika, mesehe wantah penjajah, ring galahe mangkin meseh iraga sareng sami wantah kemiskinan. Sangkaning punika iraga mangda numbuhang rasa eling sane kakawitin saking angga suang-suang malarapan antuk disiplin, kerja keras saha antuk sinarengan mangda prasida bangkit.
Kirab Merah Putih MBPS sane kamiletin sawetaran 6000 sisia SMP, SMA miwah SMK ring Kota Denpasar kalaksanayang matetujon numbuhang rasa persatuan kesatuan wiadin kekeluargaan sekolah swasta ring Bali sane maingkupan ring BMPS, numbuhang nilai-nilai kepahlawanan miwah karakter bangsa wiadi nincapang rasa eling sepisanan ngelingang jasa para pahlawan.
Parikrama sane kalaksanayang rahina semeng punika taler karauhin olih angganing Forkopimda Provinsi Bali, Wakil Walikota Denpasar wiadin angga saking Yayasan Pendukung Kirab minakadi Perdiknas Denpasar, Yayasan Saraswati Denpasar, Yayasan Dwijendra Denpasar, Yayasan Insan Mandiri, Yayasan Al Ma'ruf Denpasar, Yayasan Widya Dharma Shanti, Yayasan TP 45, Yayasan Muhammadiyah miwah Harapan . ( Rls/Btnc)
Komentar