Nglepas Kontingen BAPOMI PENGPROV Bali, Wagub Bali Ngaptiang Atlet Setata Uleng, Sportif, Jujur, Malaksana Becik
- 09 November 2022
- 20:11 WITA
- News
DENPASAR,Balitopnews.com - Wakil Gubernur Bali Prof. Tjok. Oka Sukawati ngaturang selamat ring para atlet BAPOMI sane ngangganin Bali sajeroning Pekan Olahraga Mahasiswa Nasional (POMNas) ka XVII ring Padang, Sumatera Barat. "Titiang nenten sangsaya yening puniki pinaka atlet pilihan sane pinih becik. Samian majanten sampun midabdabin angga. Mawinan antuk semangat juang pantang menyerah anggen dasar sane pinih mabuat patut kaduwenang suang-suang atlet. Antuk kapercayan angga, optimisme, kesiapan miwah tekad bulat majeng samian atlet, pelatih wiadin official kontingen Bali jagi prasida ngasilang prestasi sane becik," baos Wagub Cok Ace ri kala nglepas Kontingen BAPOMI PENGPROV Bali nyujur POMNas XVII Sumatera Barat, ring Gedung Natya Mandala Institute Seni Indonesia, Buda Wage Ukir, Buda (9/11).
Ring galahe punika, Wagub Cok Ace ngaptiang para atlet mangda ngawigunayang galah Pekan Olahraga Mahasiswa Nasional (POMNas) sane ka XVII ring Sumatera Barat puniki sajeroning ngamolihang prestasi, mawinan prasida ngawetuang rasa bangga, ngawangiang Bali ring undagan nasional.
"Antuk nginggilang nilai-nilai sportivitas, kejujuran miwah laksana sane becik, kaaptiang prasida dados karakter sane kagamel olih Kontingen BAPOMI PENGPROV Bali. Majeng samian tim Kontingen Titiang ngaptiang mangda setata nyaga kesehatan, kekompakan, kebersamaan saha ngwangun kerjasama sane becik manut ring tugas wiadin tanggungjawab suang-suang mawinan prasida ngasilang prestasi sane becik ring Pekan Olahraga Mahasiswa Nasional puniki," Baos Wagub Cok Ace.
Pekan Olahraga Mahasiswa Nasional (POMNas) ka XVII warsa 2022 puniki jagi kamiletin olih 92 atlet anruk 43 pendamping minakadi pelatih, pembina miwah offisial.
92 atlet sane mawit saking 13 Perguruan Tinggi minakad swasta miwah negeri sajebag Bali puniki jagi ngamiletin 13 cabang olahraga saking 14 cabor sane kalombayang.
Ketua Umum Bapomi Bali sane taler pinaka Wakil Rektor Bidang Kemahasiswaan Universitas Udayana) Prof. Ngakan Putu Gede Suardana ngelingang majeng para atlet mangda nenten terbebani antuk pertandingan sane kamiletin. Nanging para atlet mangda uleng ngamiletin cabang olahraga sane kamiletin. "Selami puniki Bali wenten ring ranking ka-5 saking 34 Provinsi sane wenten ring Indonesia. Sangkaning punika, samian mangda uleng saha nyaga stamina wiadin kesehatan, antuk pangapti mangda ranking 5 sane selami puniki kapolihang prasida rajeg, utawi prasida katincapang malih, majanten sayan becik," baos Prof Ngakan ri kala ngicen sambrama wacana ring ajeng panggung.
Pelepasan Kontingen BAPOMI PENGPROV Bali olih Wagub Bali Prof. Tjok. Oka Sukawati kacihnayang antuk penyematan topi atlet majeng kalih diri perwakilan kontingen.
Pelepasan Kontingen BAPOMI PENGPROV Bali sane jagi malomba ring Padang, Sumatera Barat taler karauhin olih Ketua Umum KONI Bali Oka Darmawan, Ketua BAPOMI Bali miwah Ketua BAPOMI Kabupaten/ Kota sajebag Bali, Ketua LL DIKTI Wilayah 8 Bali-Nusra miwah makudang-kudang prakangge sane mapaiketan.
Komentar