Pemprov Bali Mastikayang Nenten Wenten Pelarangan Parikrama Agama/Pangubaktian Selami KTT G20

  • 10 November 2022
  • 23:11 WITA
  • News
Kepala Dinas Komunikasi, Informatika dan Statistik Provinsi Bali Gede Pramana

Parikrama kramane kawatesin  wantah ring makudang galah wiadin genah kewanten selami KTT G20

DENPASAR, Balitopnews.com - Pemerintah Provinsi Bali mastikayang nenten wenten pelarangan parikrama agama/pangubaktian selami pamargin Konferensi Tingkat Tinggi (KTT) G20 ring Bali. Parindikan puniki mapaiketan ring kawentenan gatra  media sosial yening parikrama agama nenten kadadosang selami pamargin KTT G20 antuk pucak ipun kalaksanayang ring Nusa Dua tanggal 15-16 November 2022. “Cutetnyane nenten wenten parikrama agama wiadin pangubaktian sane nenten kadadosang, sane wenten wantah parikrama saking kramane kawatesin,” baos Kepala Dinas Komunikasi, Informatika dan Statistik Provinsi Bali Gede Pramana ring Denpasar rahina Wraspati  (10 November 2022). 

Pramana maosang, indik pembatasan parikrama kramane selami Konferensi Tingkat Tinggi (KTT) G20 Warsa 2022 kaunggahang ring Surat Edaran Nomor 35425/SEKRET/2022 indik parikrama kramane sane kawatesin selami pamargin Presidensi G20. Ring SE punika pamekas ring angka 1, sampun tinas kabaosang  Pembatasan parikrama kramane ring wewidangan Kecamatan Kuta miwah Kuta Selatan, Kabupaten Badung, miwah Denpasar Selatan kalaksanayang ring 12-17 November 2022 antuk parikrama sane kawatesin minakadi parikrama pendidikan, perkantoran pemerintah wiadin swasta,  upacara adat, parikrama agama, sajabaning fasilitas kesehatan.

Ring angka 6 katuekang majeng  Bendesa Agung MDA Provinsi Bali miwah Ketua FKUB Provinsi Bali wiadin anggota mangda nguningayang ring krama sane wenten ring jalur ngruruh ITDC Nusa Dua, Hotel Apurva Kempinski, GWK miwah Penyemaian Mangrove Kawasan Tahura mangda ngandegang riin pamargin parikrama adat wiadin ngwatesin parikrama agama sane akeh nyarengang krama ring tanggal 12-17 Nopember 2022.

Antuk punika, Pramana nureksain yening selami pamargin G20 pemerintah mastikayang pembatasan pelibatan massa ring parikrama agama boya nenten kadadosang saha punika wantah ring makudang jalur kewanten. “Cutetnyane, nenten wenten sane nenten ngadadosang pamargin parirakrama agama, nanging wantah kawatesin (akeh krama sane kasarengang, red), punika wantah ring pamargin KTT kewanten miwah kamargiang ring makudang genah,” baosnyane. 

Birokrat saking Wangaya puniki ngaptiang samian angga mangda nyokong pamargin KTT G20 mangda labdakarya. Napi malih samian pidabdab sampun kalaksanayang olih pemerintah mawit saking pemerintah pusat kantos ring desa adat. KTT G20 taler pinaka galah mabuat miwah  bersejarah sane jagi nentuang kemajuan peradaban dunia antuk tatanan kehidupan sane anyar risampun pandemi COVID-19. “Ngiring sokong pamargin Presidensi G20 mangda prasida antar labda karya. Ngiring icen sokongan ageng mangda parikrama internasional sane dahat mabuat ring jagate puniki prasida labda karya,” baosnyane.(Rls/Btnc) 


TAGS :

Komentar