Bali Sayaga Dados Etalase, Ny Putri Koster Nyarengang Daerah-Daerah Nglimbakang Kekayaan Intelektual Komunal Suang-Suang
- 24 November 2022
- 11:11 WITA
- News
Ring Seminar sane ngunggahang unteng: “Kekayaan Intelektual Komunal & Indikasi Geografis
Nyayubin Komoditi Indonesia”
JAKARTA,Balitopnews.com - Ketua Dekranasda Provinsi Bali, Ny Putri Suastini Koster, ngaptiang produk kekayaan intelektual komunal wiadin produk antuk indikasi geografis mangda kaproduksi penuh ring daerah asal mawinan prasida ngawetuang citra eksklusif, nenten pinaka mass produk sane kakaryanin olih wewidangan tiosan sajeroning ngruruh bati. " Produk punika kakaryanin ring genah wit ipun, krama ring Indonesia prasida nanjaang napi malih prasida kaanggen utawi katumbas krama internasional," baos Ny Putri Koster ri kala dados narawakya sajeroning Seminar sane ngunggahang unteng: “Kekayaan Intelektual Komunal & Indikasi Geografis Lindungi Komoditi Indonesia” ring Bidakara Hotel Jakarta, DKI Jakarta rahina Anggara (22 November 2022) sore.
Ny Putri Koster nlatarang, Bali atuk kekayaan intelektual komunal marupa tenun tradisional endek, kain songket miwah tenun ikat grinding naenin katiben pikobet selami dasaan warsa sangkaning produksi tenun khas punika kakaryanin olih wewidangan tiosan, antuk proses sane nenten tradisional malih sakadi aslinyane. Parindikan punika majanten mawesana kaon majeng pengrajin wiadin penenun lokal. " yening kabanggeang, penenun mamocol saha adolan nenten laku, ekonomi ring Bali kaon magingsir ka genah tiosan. Yening kabanggeang majanten ngawetuang sentralisasi produksi ring asiki wewidangan,"baosnyane.
Istri saking Gubernur Provinsi Bali puniki maosang yening pangupaya nglestariang warisan budaya adiluhung lokal jagi padem sangkaning pangrejeg industri skala besar, sane ngaonang pengrajin lokal, pamekas penenun ring Pulo Dewata. " Sangkaning punika, titiang ngamanahin sapunapi nyayubin pengrajin lokal saking hulu kantos hilir. Ring hulu utsahayang indik pendaftaran HAKI wiadin KIK-nyane, yening ring hilir ngiring sayubin hak-hak para pangerajin," baosnyane.
Bali sayaga manados etalase majeng produk-produk kerajinan asil kekayaan intelektual komunal saking sajebag Indonesia antuk status pinaka kawasan wisata dunia. Sakadi sane kabaosang Ny Putri Koster, sane mangkin G20, kain Gringsing tradisional dados souvernir resmi KTT G20 daweg puniki,saha endek kaanggen ring gala dinner olih kepala-kepala negara. " Bali sayaga dados Hub, etalasenyane. Dane nlatarang, indik kawentenan batik Jawa, tenun NTT wiadin kerajinan tiosan. Titiang nureksain yening ring benjang pungkur jagi ngawetuang rasa eling krama, saha kawantu taler sajeroning nyayubin Kekayaan Intelektual saking kemenkumham, mawinan produk-produk puniki prasida dados trade Mark majeng suang-suang wewidangan," baosnyane.
Miranda Risang Ayu , Penulis miwah Head of IP Center on Regulation & Application Studies, Faculty of Law, Universitas Padjadjaran maosang dasar hukum panyayub indik KIK wiadin Indikasi Geografis kawiaktiannyane sampun kamargiang ring tanah air. " Iraga sampun madue sistemnyane, madue dasar hukumnyane. Kapertama , majeng pabuat komunitas wiadin pangupaya sajeroning nyayubin saking penyalahgunaan, penipuan utawi misrepresentasi.
Sakadi kain endek saking Bali, yening wenten kaproduksi ring genah tiosan majanten HAKI komunal sane jagi nyayubin." baos Miranda.
Panyayub majeng pikaryan komunitas sakadi duen adat, taler manut Miranda jagi prasida nincapang pendapatan komunitas punika. " Punika taler ring Indikasi geografis, manados hak eksklusif majeng komunitas. Prasida manados Jaminan reputasi wiadin jaminan kualitas produk. Punika taler pinaka pelestarian lingkungan wiadin prasida ngawetuang pasar ceruknyane," baosnyane.
Seminar sane kamiletin panyatusan pamilet saking samian wewidangan ring Indonesia puniki, pinaka dudonan pamargin Roving Seminar Kekayaan Intelektual Kemenkumham RI dan Menteri Yasonna Mendengar, sane sampun kalaksanayang ring Sumatera Utara, Solo DIY, Sulawesi Selatan, saha pinih untat ring DKI Jakarta.
Ny Putri Suastini Koster ring galahe punika taler ngamolihang penghargaan pinaka Tokoh Berperan Aktif sajeroning Numbuhang Kreativitas wiadin Inovasi Kekayaan Intelektual sajeroning Pemulihan Ekonomi Nasional. (Rls/Btnc)
Komentar