Layanan Data Seluler miwah IPTV Kapademang ri kala Nyepi 2023
- 17 Maret 2023
- 20:03 WITA
- News
DENPASAR,Balitopnews.com - Pateh sakadi warsa sadurungnyane, layanan data seluler miwah IPTV (Internet Protocol Television) taler kapademang ri kala Rahina Nyepi Warsa Saka 1945 puniki, sane kapakelingin ring tanggal 22 Maret 2023. Parindikan punika kabaosang olih Kepala Dinas Komunikasi, Informatika dan Statistik Provinsi Bali, Gede Pramana sajeroning konferensi pers (17 Maret 2023). Dane maosang yening kawijakan puniki pinaka kawijakan sane kamargiang satunggil warsa olih Pemerintah Provinsi Bali sajeroning nyokong pamargin rahina Nyepi mangda prasida mamargi antar labda karya.
Keputusan puniki kakukuhang malih melarapan antuk kawentenan Surat Edaran Menteri Komunikasi dan Informatika Republik Indonesia No. 4 Warsa 2023 indik Himbauan sajeroning Nglaksanayang Seruan Pemerintah Provinsi Bali Warsa 2023 tanggal 16 Maret 2023 miwah Seruan bersama majelis-majelis agama wiadin Lembaga sosial keagamaan Provinsi Bali Warsa 2023 ngeninin indik dudonan pamargin rahina suci Nyepi Saka Warsa 1945 ring tanggal 13 Maret 2023.
Kapademangnyane layanan data seluler wiadin IPTV puniki jagi kalaksanayang saking rahina Buda, tanggal 22 Maret 2023 galah 06.00 wita kantos Kamis, 23 Maret galah 06.00 wita. “Puniki mapiteges yening samian layanan data seluler ring Hp jagi kapademang,” baos Gede Pramana. Nanging dane taler maosang yening layanan ring objek vital sakadi layanan rumah sakit, kantor kepolisian, militer, BMKG, BPPD, BASARNAS, bandara, pemadam kebakaran wiadin objek vital sane tiosan majanten kantun beroperasi. Mapaiketan ring layanan telepon, sms wiadin fiber optik kantun prasida kaanggen ri kala panyepian, mangda ri kala kramane wenten pabuat khusus sane kahanannyane emergensi, taler prasida kaicen layanan.
“Titiang ngaptiang mangda pamargin rahina Nyepi warsane puniki prasida mamargi antar, trepti, labda karya” baos Kadis Kominfos Provinsi Bali, Gede Pramana.
Komentar