Usulan Voucher Tourism Levy Pacang Kabligbagang Malih Sareng Pelaku Pariwisata
- 10 Februari 2024
- 21:02 WITA
- News
DÉNPASAR, Balitopnews.com - Usulan Penjabat Gubernur Bali, S.M. Maheédra Jaya pacang mapica voucher potongan harga ring déstinasi wisata katur ring turis dura negara sané sampun mabayahan dudukan pungutan wisatawan asing (Tourism Levy) ri kala patemuan di Kantor Gubernur Bali, Anggara Pon Wargadéan (6 Fébruari 2024) kapatutang olih Kepala Dinas Pariwisata, Tjok Bagus Pemayun. Nanging, dané negesang merluang galah, mekanisme, lan pabligaban malih sareng pelaku pariwisata. Sapunika kategesang antuk, Tjok Bagus Pemayun, birokrat saking Gianyar, Saniscara Paing Warigadéan (10 Fébruari 2024).
Indiké puniki nampénin orti ngenénin indik voucher potongan harga ring sané sampun naur dudukan wisatawan asing. Tjok Pemayun mastikayang kantos rahina mangkin durung micayang voucher potongan harga ri antukan usulan punika wawu kabaosang. “Sekadi sané kabaosang antuk Bapak Pj Gubernur, usulan puniki pinaka sarana nuldulin kayun wisatawan asing mangda naur Tourism Levy. Nanging kantun bligbagang malih mangda pamarginé antar kasarengin antuk pelaku pariwisata sané ngelola déstinasi wisata,” baos Tjok Pemayun.
Sadurungnyané, Pj Gubernur Bali, S.M. Mahéndra Jaya ngrauhin paruman indik Pungutan Bagi Wisatawan Asing sareng Dinas Pariwisata Provinsi Bali, Dinas Komunikasi, Informatika dan Statistik Provinsi Bali, Badan Pendapatan Provinsi Bali dan Biro Hukum Setda Provinsi Bali ri galah Anggara Pon Warigadéan (6 Fébruari 2024) ring Ruang Rapat Kantor Gubernur Bali. Daweg punika dané ngaptiang Tourism Levy prasida kakerjasamaang sareng déstinasi-déstinasi wisata ring Bali marupa voucher potongan harga katur ring turis dura negara sané naur Tourism Levy.
Manut Pj Gubernur Bali, potongan harga puniki prasida nuldulin kayun turis dura negara naur Tourism Levy. Ri samping turis dura negara maduwé andil ring utsaha nglestariang budaya lan gumi Bali, ipun taler ngamolihang voucher potongan harga ring déstinasi-déstinasi unggulan ring Bali. Punika taler déstinasi wisata sané dados mitra kanti Tourism Levy pacang ngamolihang bati riantukan nyokong pangrauh turis dura negara ring genahe punika. Dané maosang prasida ngamedalang simbiosis mutualisme, saling nguntungang ring pemerintah daerah lan industri pariwisata Bali.
Pamargi voucher potongan harga merluang galah lan pabligbagan malih sareng Pemerintah Provinsi Bali lan industri-industri pariwisata di Bali. Patut baosang sareng-sareng mangda kebijakan puniki prasida mamargi antar tur micayang sekaya ring pariwisata Bali, industry, lan krama Bali. Pinih mabuat indik wisatawan naur Tourism Levy tan pamarasa mapaksa. Nika mawinan Mahéndra Jaya setata negesang terus nyobiahang indik dudukan utawi pungutan bagi wisatawan asing punika. (Rls/Btnc)
Komentar