Pj. Gubernur Bali Macecingak ring Pasar Murah
- 25 Februari 2024
- 12:02 WITA
- News
DÉNPASAR, Balitopnews.com - Pj. Gubernur Bali S.M. Mahéndra Jaya kasarengin Sekretaris Daérah Provinsi Bali Déwa Madé Indra, Ketua Dharma Wanita Persatuan (DWP) Provinsi Bali Ny. Widiasmini Indra lan Kepala Perangkat Daérah Provinsi Bali nyingakin pamargi pasar murah sané kalaksanayang pinaka pidabdab pengendalian inflasi nyanggra rahinan jagat Galungan lan Kuningan ring Kantor Gubernur Bali, Redité Paing Dungulan (25 Fébruari 2024) semeng.
Sapuput macecingak lan matumbasan ring pasar murah, Pj. Gubernur Bali maosang nyanggra rahinan jagat Galungan lan Kuningan pastika pabuat kramané ngancan nincap. Pemprov Bali urati ring pikobet kramané, nika ngawinang ngawangun kanti sareng BPD Bali, Bank Indonésia, lan sané tiosan nglaksanayang pasar murah. “Titiang ngaptiang pasar murah puniki prasida nulungin kramané numbas beras, minyak goréng, telor, who-wohan kantos canang antuk pangarga sané mudah,” baos Mahéndra Jaya.
Sekretaris Daérah Provinsi Bali, Déwa Madé Indra ri kala kawawancarain olih wartawan maosang pasar murah pinaka utsaha pemerintah mapica pangarga mudah majeng krama apang sida ngmargiang rerahinan jagat. Sékda Déwa Indra maosang,
Wénten petang (4) stratégi pengendalian inflasi luiré keterjangkauan harga, ketercukupan suplai, kelancaran distribusi lan komunikasi. Komunikasi sané kabaosang pinaka sarana mangda kramané percaya yéning sané kasaratang maksami wénten.
“Yadiastun alit, sakémawon pamargi pasar murah sida nyiagayang barang-barang sané kasaratang. Gas LPG 3 kg kocap langka, wénten ring pasar murah, beras taler wénten. Efék psikologis krama puniki pacang pemerintah uratiang, makasami barang sané kasaratang wénten ring pasar murah. Titiang ngaptiang kramané nénten matumbasan bes akéh, cukup nganutin kebutuhan, persediaan aman,” teges Déwa Madé Indra.
Indik gas LPG 3 Kg sané kabaosang langka, Sékda Bali negesang sampun marerembugan sareng instansi tiosan tur kacumpuang ngimbuhin suplai 250 ribu gas LPG 3 Kg. Paweweh suplai puniki pastika cukup anggén Galungan tur stoknyané aman. Krama sampunang gresiuh, pemerintah daérah sampun ngrerehang pamargi mangda gas LPG 3 Kg aman.
Déwa Indra taler nunasang kramané sampunang gresiuh indik pangarga beras sané nincap ri antukan gelis jagi manyi tur pangargan beras pastika mudah. Pangargan beras nincap ri antukan durung masan manyi tur wénten badai él nino. Bulan Fébruari lan Maret sampun masan manyi, pikolih nincap tur pangargan beras pastika mudah. Pemerintah sampun ngmargiang operasi pasar mangda kramané sida matumbasan. Kramané sida numbas beras SPHP sané kamargiang antuk pemerintah sareng Perum Bulog.
Macecingak ring pasar murah kairinin antuk Pencanangan Gerakan Tanam Pangan Cepat Panen marupa nandur bibit jagung antuk Pj. Gubernur Bali, Sékda Bali, Deputi Kepala Perwakilan Bank Indonésia Provinsi Bali, Direktur BPD Bali lan Kepala Perangkat Daérah Provinsi Bali ring kangin Kantor Gubernur Bali. (Rls/Btnc)
Komentar