Dinas Pariwisata Bali Pacang Nuréksanin “Levy Voucher” ring DTW
- 26 Februari 2024
- 12:02 WITA
- News
DÉNPASAR, Balitopnews.com – Panuréksan voucher dudukan wisatawan nénten kacutetin ring genah ngranjing ka Bali sakadi bandara lan pelabuhan, sakéwanten kalimbakang manut Perda lan Pergub, panuréksan taler kalaksanayang ring daya tarik wisata (DTW) ring Bali. Indiké puniki kategasang olih Kepala Dinas Pariwisata Provinsi Bali, Tjok Bagus Pemayun, ring kantor Dinas Pariwisata Provinsi Bali, Soma Pon Dungulan, (26 Fébruari 2024) sapuput parum persiapan Pengecékan Voucher Pungutan Wisatawan sané karauhin olih Satpol PP, Kesbangpol, Diskominfos, bank BPD Bali, GIPI, ASITA, lan HPI.
Pamargi puniki kalaksanayang sesampun program pungutan wisatawan puniki mamargi salami tigang (3) bulan. Panuréksan ring DTW pacang kalaksanayang ngawit bulan Méi 2024, nyabran pitung dina apisan ring makudang-kudang DTW. “Titiang pacang ngmargiang monitorin rutin pinaka dasar ngajegang pararem jagi nuréksanin wisatawan sané sampun naur dudukan,” baos Tjok Bagus. Majeng sané sampun naur kapicayang maplesiran, majeng sané durung naur pacang kauduhang naur ring DTW.
Tjok Bagus mapinunas majeng makasami turis sané ka Bali mangda ngriinin naur ring negarannyané malarapan sistem sané sampun kacumawisang inggih punika “lovebali.baliprov.go.id” mangda turisé nénten marasa likad maplesiran ka Bali. majeng travel agent mangda satata nyobiahang majeng turis mangda nyiagatang voucherné salami ring Bali, ri antukan pacang wénten panuréksan saking Satuan Polisi Pamong Praja Pariwisata Provinsi Bali ring DTW utawi genah tiosan. Guide kaaptiang mapica gatra indik dudukan majeng turis mangda naur dudukan.
Pamucuk GIPI Bali, Ida Bagus Agung Partha Adnyana cumpu kalaksanayang panuréksan voucher levy ring DTW. Samalihnyané, bahkan Gus Agung jeritan tokoh pariwisata Sanur puniki nusang panuréksan taler kalaksanayang ring akomodasi pariwisata sadurung turis check out lan ring Keberangkatan Internasional Bandara I Gusti Ngurah Rai.
Pamucuk ASITA Bali, Putu Winastra taler cumpu wénten dudukan wisatawan tur nunusang salami tigang sasih sadurung ngmargiang panuréksan patut mecikang system pembayaran, nglimbakang pawarah-warah, nglimbakang gatra dudukan turis ring Bandara Ngurah Rai, lan nyiagayang petugas mangda panuréksan mamargi labda karya. (Rls/Btnc)
Komentar