Panyineban Bulan Bahasa Bali kaping VI Yowana Kaaptiang Nglestatiang Basa Bali ring Aab Budaya Global
- 02 Maret 2024
- 14:03 WITA
- News
DENPASAR, Balitopnews.com - Sekretaris Daerah Provinsi Bali Dewa Made Indra nyineb Bulan Bahasa Bali kaping VI warsa 2024 sane sampun kamargiang salami a bulan, Saniscara Pon Dungulan (2 Maret 2024) ring Gedung Ksrirarnawa, Art Centre, Denpasar.
Sekda Dewa Indra ngwalinin Gubernur Bali micayang apresiasi antuk pamargin Bulan Bahasa Bali kaping VI, pinaka Utsawa pemerintah nglestariang basa Bali. Dewa Indra ngaptiang pakeling Bulan Bahasa Bali boya euforia nanging yowana patut nglestariang basa Bali ring aab jagat budaya globalisasi. “Majeng para jayanti wimbakara lan sane molihang piagem Titiang ngaturang rahajeng dumogi prasida nicapang malih tur sida ngembasang yowana waged lan tresna Mabasa Bali,” baos Dewa Indra.
Kepala Dinas Kebudayaan Provinsi Bali I Gede Arya Sugiartha maosang, Bulan Bahasa Bali kaping VI sampun mamargi antar labda karya. Makudang-kudang acara kamargiang Luhde Utsawa Nyurat Lontar lan mengetik aksara Bali nganggen keyboard kasarengin 600 murid SMA/SMK lan mahasiswa, taler 852 pamuput duta kabupaten/kota nyarengin wimbakara. 606 pamilet nyarengin Widyatula lan acara lianan.
Gede Arya Sugiarta maosang, ring Bulan Bahasa Bali kaping VI taler nyerahang piagem Warisan Budaya Tak Benda katur majeng Dinas Kebudayaan Provinsi Bali indik ngaben, malukat, lan rahina Nyepi. Majeng Dinas Kebudayaan Kabupaten Tabanan indik jukut ginda lan magendu. Dinas Kebudayaan Karangasem indik Tari Rejang Gede. Dinas Pariwisata dan Kebudayaan Bangli indik loloh cemcem lan Nganten massal Pengotan. Dinas Kebudayaan Buleleng indik sampi gerumbungan lan ngarak sokok. Dinas Kebudayaan Klungkung indik uyah Kusamba. Dinas Pariwisata dan Kebudayaan Kabupaten Jembrana indik tenun cagcag, bumbung kepyak, lan kendang mabarung. Dinas Kebudayaan Kota Denpasar indik lukisan I Gusti Mase Dablog lan Tari Baris Kekupu Banjar Lebah Denpasar.
Ri galah punika, Sekda Dewa Indra taler nyerahang piagem majeng para jayanti wimbakara lan nyineb antuk tema Bulan Bahasa Bali kaping VII warsa 2025. (Rls/Btnc)
Komentar