Gubernur Koster : "Puputang Reklamasi ring Wawidangan Pelabuhan Benoa!"
- 26 Agustus 2019
- 06:09 WITA
- News
Balitopnews.com, Denpasar
Gubernur Bali, Wayan Koster mapangapti majeng ring PT Pelabuhan Indonesia (Pelindo) III mangda digelis ngandegang tur muputang reklamasi ring wawidangan sane jimbaripun 85 Hektar ring sawawengkon Pelabuhan Benoa. Utsaha ngandegang puniki kamargiang duaning pengurukan wawidangan sagara punika sampun makahawinan rusaknyane ekosistem bakau sane jimbarnyane 17 Hektar tur prasida ngawetuang makudang-kudang pelanggaran.
Permintaan punika kasobyahang olih Gubernur Koster sajeroning surat/sewala patra resmi majeng ring Direktur Utama Pelindo III sane taler katembusang majeng ring Menteri BUMN, Menteri Lingkungan Hidup lan Kehutanan, Menteri Perhubungan, miwah Menteri Agraria lan Penataan Ruang.
Ring sajeroning palet (a) sewala patra punika Gubernur Koster mapangapti majeng ring Pelindo III mangda nenten ngalanturang pamargin reklamasi miwah pengembangan ring wawidangan Dumping I lan Dumping II wit saking sewala patra puniki katerima.
Salanturnyane ring palet (b) Pelindo III kaaptiang mangda digelis ngamargiang pemulihan majeng ring kerusakan lingkungan miwah ekosistem mangrove. Ring palet (c) Gubernur Koster mapangapti mangda Pelindo III digelis ngamargiang penataan wawidangan Dumping I miwah Dumping II mangda wawidangan punika makanten kaupapira becik.
Ring sajeroning palet (c) puniki taler Gubernur Koster negesang inggian risampune kabecikang, wawidangan punika wantah dados kawigunayang pinaka Ruang Terbuka Hijau (RTH). Pamaniteges puniki janten pacang ngelongin tur matalang pangrancana awal Pelindo III rikala pacang ngawangun makudang-kudang fasilitas penunjang pelabuhan miwah fasilitas komersial ring duur lahan pikolih saking utsaha pengurukan. Selehin ring pangrancana sane riinan wantah atenga wawidangan pikolih saking pengurukan pacang kawigunayang pinaka anggen ngalimbakang Marine Tourism Hub majeng ring kota Denpasar.
Sakemaon ring palet sane pinih ungkur (d) Gubernur Koster mapangapti majeng ring Pelindo III mangda ngamargiang kaji ulang majeng ring Rencana Induk Pengembangan (RIP) Pelabuhan Benoa mangda nguratiang tatanan sane manut ring Visi Nangun Sat Kerthi Loka Bali.
Medalnyane sewala patra puniki kakawitin olih wentenyane pelanggaran ring sajeroning pengurukan lahan miwah kerusakan palemahan sane kawetuang sangkaning wentenyane pelanggaran punika.
Manut dokumen sane sampun wenten, reklamasi sane kamargiang olih Pelindo III majeng ring lahan sane jimbaripun 85 Ha sane kakepah antuk lokasi dumping 1 sane jimbaripun 47 Ha sampun kamargiang sane sampun kamargiang malantaran antuk proses administrasi sane ngawit warsa 2012, parikrama pengembangan punika ngawit warsa 2017, miwah mangkin sampun mamargi antuk capaian progres 88,81%.
"Dampak lingkungan sane metu saking upaya punika wantah rusaknyane wawidangan palemahan/lingkungan sane sampun parah tur ngawinang padem vegetasi alas bakau/mangrove miwah ekosistem sane tiosan sane jimbarnyane langkung ring 17 Ha magenah ring Kaja Kangin wawidangan Dumping II. Kahanan punika metu sangkaning wenten pelanggaran pengerjaan teknis inggih punika nenten kawangun tanggul penahan utawi revetment miwah nenten kapasang Silt Screen manut ring Rencana Pengelolaan Lingkungan (RKL) sane mungguh ring dokumen AMDAL," baos Gubernur Koster nalatarang.
Sajabaning punika, parikrama pengembangan sane sayan ngalinggahang puniki ngawinang ngusak-asik wawidangan sane kasuciang miwah icalnyane keindahan tur keasrian alam ring wawidangan perairan Teluk Benoa, dadosnyane sampun polih palungguhan miwah reaksi saking makudang-kudang komponen krama.
Pelanggaran-pelanggaran miwah kerusakan vegetasi mangrove puniki katemuang olih Tim Monitoring saking Dinas Lingkungan Hidup Provinsi Bali.
Ngawit Februari 2019, Tim Monitoring sampun ngamargiang pat parikrama kunjungan ring lapangan lan sampun nemuang makudang-kudang pelanggaran miwah kerusakan lingkungan. Temuan puniki sampun aturang titiang majeng ring Bapak Gubernur," Kepala Dinas Lingkungan Hidup Provinsi Bali, I Made Teja maosang.
Gubernur Koster mapakeling inggian Visi Pawangunan Daerah Bali inggih punika "NANGUN SAT KERTHI LOKA BALI" malarapan antuk Pola Pembangunan Semesta Berencana Menuju Bali Era Baru, sane madrue arti "Ngemit Kesucian miwah Keharmonisan Alam Bali rauhing Sadagingnyane, Matatujon Ngutsahayang Kauripan Krama Bali Mangda Sukerta lan Bagian, Sekala miwah Niskala, katangiang antuk utsaha menata fundamental lan komprehensif pawangunan Bali sane kawangun antuk tiga aspek utama: Alam/Palemahan, Krama/Pawongan miwah Kebudayaan Bali.
"Manut ring visi punika, DPRD Provinsi Bali sampun nyumpunin Revisi PERDA No. 16 warsa 2019 indik RTRWP Bali sane sampun negesang inggian Teluk Benoa wantah Kawasan/Wawidangan Konservasi," baos Gubernur sane taler kajudi pinaka Ketua DPD PDI Perjuangan Bali punika.
Duaning kadi asapunika, Gubernur Koster nyobyahang inggian pamargin upaya Pengembangan Kawasan Pelabuhan Benoa pinaka Marine Tourism Hub ring Kota Denpasar nenten anut ring Visi Pawangunan Daerah Bali, Nangun Sat Kerthi Loka Bali punika.
"Patut kauningin inggian makasami dampak sane metu saking utsaha ngamargiang pawangunan ring wawidangan Provinsi Bali sane ngusak-asik keseimbangan lan kesucian Alam, Krama lan Kebudayaan Bali ungkurnyane wantah dados tanggungjawab Pemerintah Provinsi Bali, Kabupaten/Kota Se-Bali," tegesnyane. (Balitopnews.com/Amo Bali)
Komentar