Ibu Putri Koster Ngicenin Motovasi Mangda Keluarga Bali Madrue 4 Anak
- 26 Agustus 2019
- 12:19 WITA
- News
Balitopnews.com, Tabanan
Fluktuatifnyane kahanan perekonomian ring sajeroning kulawarga, satata dados tatimbang ring sajeroning ngambil keputusan ring kulawarga, silih sinunggilnyane ngeninin indik jumlah utawi akeh madrue anak/putra.
Paindikan puniki kantun katakutin olih kulawarga ring Bali, dadosnyane jumlah penduduk ring Bali sane madrue swadharma ngemit sapisanan ngajegang adat lan budaya Bali sayan ngedikang nyabran warsa.
Indik puniki polih uratian khusus saking Tim Penggerak PKK Provinsi Bali, dadosnyane warsa periode sane kapertama ring sajeroning kepemimpinan Gubernur Wayan Koster miwah Wagub Tjok Oka Artha Ardhana Sukawati pacang ngulengang utsaha anggen nyobyahang utawi mensosialisasikan kawentenan budaya 4 anak/putra sajeroning asiki kulawarga.
Indik puniki kasonyahang olih Ketua TP PKK Provinsi Bali Ibu Putri Suastini Koster rikala ngamargiang kunjungan kerja ring Gedung I Ketut Maria, Tabanan, rahina Soma (26 Agustus 2019).
Ri tepengan puniki, Ibu Putri Koster mapakeling inggian jumlah anak/putra yening lebih ring 2 diri sampunang jejeh ring pikahyun, duaning rejeki punika pacang nyarengin sajeroning pawetuan i anak rikala sampun nincap grahastha asrama. Kulawarga alit pamekas sane wawu mawiwaha, kaaptiang pisan mangda sareng nukung program Pemerintah Provinsi Bali antuk tetep nyaga pesengan "Komang lan Ketut" ring sajeroning kulawarga.
"Pianak punika wantah penerus kulawarga sane kapungkur madrue swadharma nitenin sanggah/merajan kulawarga," baos Ibu Putri Koster rikala ngicenin pengarahan.
Kunjungan kerja Ketua TP PKK Provinsi Bali sane karangkepang sareng program kegiatan Tim Penggerak PKK Provinsi Bali sareng OPD Provinsi Bali sajeroning utsaha nukung visi Nangun Sat Kerthi Loka Bali malarapan pola pembangunan semesta berencana nuju Bali Era Baru, kadagingin antuk nyukserahang ajengan sehat maweweh susu formula majeng ring tiga bayi/balita, sane kaaptiang ipun mangda tumbuh becik tur sehat.
Kawewehin olih Ibu Putri Koster inggian anak-anak ngawit saking balita patut polih asupan gizi sane jangkep, mangda nenten mapuara kaon ring pertumbuhannyane pamekas rikala ngarepin masa periode emas.
Mapaiketan ring parikrama puniki kadagingin taler upaya sane tatujonyane nincapang semangat lansia, inggian punika antuk ngamargiang senam bersama/sinarengan saking Ketua TP PKK Provinsi Bali kaabih olih Ibu Tjok Istri Putri Hariyani Sukawati, Ketua TP PKK Kabupaten Tabanan miwah anggota TP PKK sane lianan.
Risampune ngamargiang makudang-kudang paletan parikrama, rombongan ngalanturang pamargi ke HATINYA PKK sane magenah ring wawidangan Dauh Pala, Tabanan.
Malarapan antuk kunjungan puniki Ketua TP PKK Provinsi Bali ngajak sang sane nuenang rumah contoh HATINYA PKK mangda nularang penataan rumah antuk pelamahan sane asri, teratur, indah, lan nyaman majeng ring para tetangga. Ajakan puniki kasobyahang, duaning PKK pinaka bagian saking pemerintah patut prasida nukung program sane sedeng kagalakkang anggen ngutamayang kepentingan krama umum. (Balitopnews.com/Amo Bali).
Komentar