Dermaga Tanah Ampo Kalanturang, Gubernur Koster Mapangapti 70 % Pikolih Kapuponin olih Karangasem
- 27 Agustus 2019
- 13:40 WITA
- News
Balitopnews.com, Denpasar
Nasib pamargin pawangunan proyek dermaga Tanah Ampo, Karangasem sane sampun sue tambis-tambis kambang, ngawit mangkin sampun nemuang pamicutet sane pastika. Inggih punika kacihnayang antuk kalinggatanganin nota kesepahaman pantaraning Kementerian Perhubungan, Pemprov Bali miwah Pemkab Karangasem ngeninin indik Pawangunan Pelabuhan Tanah Ampo, rahina Anggara (27 Agustus 2019) ring Wiswa Sabha Pratama Kantor Gubernur Bali, Denpasar.
Manut Gubernur Koster inggian kalanturan pawangunan dermaga bertaraf internasional sane magenah ring wawidangan kabupaten paling kangin Pulo Bali puniki maka cihna sumeken pemerintahannyane ngawerdiang visi pawangunan infrastruktur terintegrasi darat, laut miwah udara.
"Dermaga Tanah Ampo sane saking dumun nenten puput-puput titiang manahang mabuat pisan ring sajeroning ngabungang infrastruktur ring Bali. Sampun wenten lampu hijau saking Bapak Presiden (Joko Widodo), Bapak Menteri taler sampun nyingakin langsung. Duaning punika, sane mangkin tahapan-tahapannyane patut kapuputang mangda digelis makanten progres saking proyek puniki," baos Gubernur sane embas ring Sembiran, Kabupaten Buleleng puniki.
Gubernur sane embas ring Desa Sembiran, Buleleng puniki daat mapangapti kalanturan pawangunan dermaga sane bertaraf internasional ring wawidangan Tanah Ampo pacang mapikolih sajeroning pertumbuhan miwah utsaha nincapang kasukertan ekonomi kramane ring Karangasem.
"Iraga ring Provinsi nenten pacang nunas akeh-akeh, banggeang Kabupaten Karangasem sane akehan muponin pikolihnyane, nyantos 70% nenten dados wicara yening sampun mamargi kapungkur. Duaning swadharman titiang sareng sami ring Provinsi matatujon ngawantu nincapang perekonomian ring daerah sakadi ring Karangasem," baos dane nalatarang.
Nanging Gubernur sane taler kajudi pinaka Ketua DPD PDI Perjuangan Bali puniki mapakeling mangda kapungkur pengelolaan dermaga sane tatujonnyane kaaptiang pinaka silih sinunggil infrastruktur penunjang pariwisata Bali puniki kalaksanayang profesional.
"Salami puniki wenten pakrimik saking krama maosang iraga wantah mampu ngawangun kemanten, lan nenten bisa melihara. Patut kaicalang pikahyun sane kadi asapunika, katitenin becik, profesional dadosnyane prasida sayuwakti ngicenin kawigunan majeng ring krama lianan, pamekasnyane sane magenah ring Karangasem," pangaptin Gubernur.
Salanturnyane mapaiketan ring sistem pawangunan dermaga sane pacang mengakomodasi kapal pesiar utawi cruise saking mancanagara puniki pacang nganggen pola kerjasama pantaraning pemerintah pusat, daerah lan swasta. "Titiang nyingakin desainnyane becik pisan," baos mantan anggota DPR RI tiga periode puniki.
Tiosan ring punika, Direktur Jendral Hubungan Laut (Dirjen Hubla) Kemenhub Agus Purnomo maosang inggian progres pawangunan Dermaga Tanah Ampo sampun mamargi manut tahapan miwah pangrancana. Saking Kemenhub pamekas manut dane pacang ngaturin dokumen penuh mapaiketan ring proyek puniki. "MoU puniki pinaka langkah pangawit sane mabuat matatujon anggen nerusang pamargi salanturnyane. Titiang angayu bagia majeng ring Bali duaning sami sumeken lan semangat pisan ngalanturang upaya pawangunan dermaga puniki, tur sampun majanten pacang mawiguna anggen nukung tahapan salanturnyane," baos Purnomo saha ngaturang pamuji.
Nanging pinaka tahap sane kapertama pawangunan ring warsane mangkin manut dane pacang kakawitin antuk maripurnayang dermaga pinaka genah kapal-kapal sane ageng malabuh. "Salanturnyane wawu raris kalanturang antuk pawangunan-pawangunan terminal miwah sarana pendukung sane tiosan, mustikannyane anggen nukung industri pariwisata sane wenten irika," baos Purnomo.
Ri tepengan punika, Bupati Karangasem IGA Mas Sumantri nyihnayang rasa seneng tur bagia antuk progres gelis muputang Demaga Tanah Ampo. "Sampun pastika titiang mapangapti antuk mamarginyane dermaga puniki, prasida ngawantu Karangasem anggen nincapang pawangunan perekonomian, nguber ketertinggalan saking kabupaten sane tiosan," pangaptinnyane. (Balitopnews.com/Amo Bali )
Komentar