Gubernur Koster Negesang Utsaha Sajeroning Nincapang Pamor Arak Bali
- 31 Agustus 2019
- 03:12 WITA
- News
Balitopnews.com, Denpasar
Gubernur Bali Wayan Koster negesang utsaha sane matatujon nincapang pamor arak pinaka inuman tradisional khas Pulo Dewata, sane madrue daya saing ring tingkat internasional.
"Rasa, aroma, packaging rauh ring desain botolnyane patut kakaryanin becik-becik. Ingkupang sareng rumah desain, pinaka produk industri kreatif sane madasar antuk budaya sane nganggen branding Bali," baos Gubernur Koster rikala nyanggra audiensi Indonesian Food & Bevarage Executive Association (IFBEC) Bali ring Rumah Jabatan Jaya Sabha, Denpasar, rahina Wraspati (29 Agustus 2019) wengi.
Gubernur Koster ring tepengan puniki nyumekenang, yening iraga maosang kemasan, dadosnyane produk sane akeh kautsahayang olih petani lokal ring pelosok desa puniki patut yukti-yukti kakemas antuk nginggilang unsur-unsur kearifan lokal sane wenten ring Bali. "Nanging sampun janten nenten nombahang taler kaingkupang antuk ide-ide kekinian sane karipta olih para yowana-yowana kreatif iraga," baos Gubernur Koster sane embas ring Sembiran, Buleleng puniki.
Produk sane madrue kualitas, packaging becik, kawewehin antuk pemasaran sane tepat prasida pacang nincapang cakupan pemasaran produk fermentasi nira pohon kelapa punika. "Kakaput utawi kakemas lan kaadol sakadi produk sane kasenengin ring pasar, mapuara pacang kaserap olih konsumen," baosnyane nalatarang.
Madrue pikahyunan sane pateh sareng Gubernur Bali, Kepala Dinas Ketahanan Pangan Provinsi Bali Wayan Jarta nyobyahang pihaknyane sedeng ngamargiang pengkajian indik selera pasar utawi sane kasenengin ring pasar, pamekas ring sajeroning produk inuman beralkohol. "Wilangan 40 persen kandungan alkohol titiang polihang tur kadadosang pinaka wilangan sane maksimal, tan bina sakadi wiski utawi inuman alkohol sane lianan. Nanging ring lapangan, arak sane akeh beredar prasida nyantos 45 persen kadar alkohol ipun," baos Jarta.
Nanging tiosan ring punika, Jarta mastikayang perajin arak tradisional sampun cukup siap nincap dados level industri. Mangda prasida ngontrol kadar alkohol, pacang kadukung antuk pelatihan teknik pengolahan, fermentasi miwah penyulingan sane becik tur sampun majanten sane pinih mabuat nitenin permodalannyane.
Krama sane madue swagina ngaryanin arak tradisional sampun titiang data tur sampun siaga ngamargiang produksi, kasarengin taler saking pihak BPPOM anggen ngemit keamanan produnyane," baos dane.
Tios ring punika, Ketua IFBEC Bali Ketut Darmayasa maosang pihaknyane nukung penuh utsaha pelestarian miwah promosi arak, rauhing ring makudang-kudang produk ajeng-ajengan lan inum-inuman lokal tiosan sane ngalimbak ring Bali. "Ring galah sane nampek puniki, titiang taler pacang ngamargiang Festival Warisan Budaya inggian ring acara punika arak miwah produk lokal sane tiosan manados highlight-nyane," baos Darmayasa. (Balitopnews.com / Amo Bali)
Komentar