Ibu Putri Koster Nyarengin Generasi Milenial Nincapang Industri Mode sane Bertema Seni Budaya
- 31 Agustus 2019
- 13:53 WITA
- News
Balitopnews.com, Badung
Ketua Dewan Kerajinan Nasional Daerah (Dekranasda) Provinsi Bali Ibu Putri Suastini Koster nyarengin krama, pamekas generasi milenial mangda mawali nincapang industri mode bertema seni budaya Bali, pinaka pamargi ngarepin tantangan globalisasi sane sayan ngusak asik budaya lokal.
Indik puniki kasobyahang olih Ibu Putri Koster rikala dados narawakya ring sajeroning acara seminar bertema 'Milenial Tourism sajeroning Ngarepin Peluang miwah Tantangan,' magenah ring The Trans Resort Bali, Badung, Saniscara (31 Agustus 2019).
Ibu Putri Koster ngawewehin, generasi muda pinaka generasi pembangunan patut peka ngarepin kondisi Bali rikala mangkin. Akeh tantangan sane patut kaharepin miwah karerehang pamarginnyane duaning yening banggeang terus-terus duaning pacang ngicalang budaya Bali sane wantah warisang adiluhung para leluhur. "Silih sinunggil upaya ngarepin tantangan utawi pikobet puniki, duaning ring lini dunia fasion wantah ngamijilang makudang-kudang desain sane bertema ornamen khas Bali sakadi wentuk papatran (sarwa tumuwuh), kakarangan (fauna/baburonan) lan nuansa seni budaya Bali sane tiosan," baosnyane.
Anak istri sane kaloktah pinaka seniman multitalenta puniki maosang inggian ring era warsa 80-an, akeh para desainer Bali sane ngariptayang desain mode sane bertema seni budaya Bali, nyantos prasida ngalimbak rauh ke dura nagara utawi internasional. "Duaning punika, ngiring iraga tincapang malih miwah werdiang desain-desain Bali sane sampun janten prasida nganutin sareng pembaharuan sane ngalimbak ring aab mangkin," baos rabin sang sane nyakrawathi provinsi Bali punika saha mapangapti.
Tios ring punika, Ibu Putri Koster taler ngaptiang antuk mamarginyane parikrama makudang-kudang event fasion miwah pameran-pameran sane kalaksanayang olih pemerintah utawi suasta, pacang prasida nultul kreasi desainer yowana Bali mangda prasida ngariptayang makudang karya desain sane berkualitas miwah berdaya saing nasional miwah internasional. Makudang-kudang karya desain punika, sampun majanten satata nginggilang kearifan lokal Bali sakadi sane kakaryanin antuk bahan dasar kain endek. "Titiang ngaptiang para desainer yowana iraga mangda prasida ngariptayang desain sane malakar antuk bahan dasar endek, mangda prasida go nasional rauh ring internasinal," baos dane.
Malarapan kadi asapunika, kapungkur dane mapangapti antuk ngamargiang seminar puniki kaaptiang prasida ngicenin masukan miwah semangat majeng ring generasi muda utawi kalangan swasta, mangda sayan nincapang kemajuan sentra-sentra produksi busana saking Bali dadosnyane pasaranipun prasida sayan nincap nyantos ngalimbak keluar, sakadi sane naenin booming ring warsa 80-an.
Ring sajeroning parikrama sane karauhin olih 200 (satak) diri pamilet sane mawit saking pelaku bisnis, mahasisya, tur saking pelaku usaha terkait, taler kahaturin sajian materi olih makudang-kudang narawakya, sakadi saking Ketua Aliansi Masyarakat Pariwisata Bali Gusti Kade Sutawa, Kepala Dinas Pariwisata Provinsi Bali I Putu Astawa, Anggota Dewan Pertimbangan Kadin Panudiana Kuhn, Ketua Komite Ekonomi lan Industri Nasional Sutrisno Bahar miwah Ketua Kadin Bali Made Ariandi SH. (Balitopnews.com/Amo Bali).
Komentar