Ibu Putri Koster Mapangapti Kamiikan Bunga Lokal Bali Prasida Ngalimbak Nyantos ke Dura Nagara
- 02 September 2019
- 01:40 WITA
- News
Balitopnews.com, Denpasar
Ketua TP PKK Provinsi Bali Ibu Putri Koster mapangapti mangda kamiikan bunga/sekar miwah makudang-kudang flora utawi sarwa tumuwuh khas lokal Bali prasida kasub nyantos ke dura nagara. Duaning kadi punika, danemapikeling mangda para perangkai bunga nenten wantah madue orientasi sareng produk saking dura negeri kemanten.
"Tungkalikannyane, iraga sane patut ngenalang napi-napi sane dados padruen iraga ke dunia internasional, antuk catatan mangda tetep berpijak ring kearifan lokal," baosnyane ring sajeroning sambrama wacana acara Floral Arrangement Demo and Workshop ring Plaza Renon, rahina Redite (1 September 2019).
Ibu Putri Koster ngawewehin, Bali madrue makudang-kudang jenis bunga/sekar sane nenten kalah beciknyane yening saihang ring bunga saking dura nagara tiosan. "Sampunang nyantos makasami impor. Iraga patut tincapang gengsi bunga lokal," baosnyane negesin.
Dane mapangapti dumogi kapungkur Bali maderbe seni merangkai bunga sakadi ring Jepang sane kaloktah kawastanin Ikebana. "Iraga karyanin nama/wasta sane adung anggen sajeroning pakaryan seni merangkai bunga khas Bali," baos dane ngawewehin.
Ring galah punika, dane ngaturin pamuji sajeroning kawagedan Didon Kanjeng, silih sinunggil Bali Floral Designer sane ngasilang karya-karya sane adiluhung tur becik pisan, tur sane ngawigunayang jenis bunga/sekar lokal.
Dane mapangapti, pamilet workshop prasida nulad semangat miwah kreatifitas sane kacihnayang olih Didon. "Didon wantah jadma sane kalintang luwih. Dane maderbe sarwa kabisan. Titiang dumun naenin kenal sareng dane pinaka monolog teater miwah pangwacen puisi sane dahat kapiande," baosnyane nuturang.
Manut jadma adiri sakadi Didon madrue peran pinaka pemantik miwah pemicu. "Iraga nenten perlu meniru, nanging tangiang karya-karya sane marupa anyar lan limbakang kreatifitas," baosnye nuturang.
Tios ring punika, Didon Kajeng nguncarang parama suksema ring sajeroning apreasiasi sane kapica saking Putri Koster.
Dane nalatarang, nenten dangan nincapang rasa percaya diri rikala anggan dane nenten malih prasida nyingakin. Nanging, dane tetep bangkit miwah mautsaha nyantos kasuen-suen kepercayaan dirinyane mawali pulih/seger.
Ring sajeroning katunan punika, mapuara raris ngariptayang karya-karya sane makahawinan nyon tur angob saluiring sang sane ngatenang.
Manut Didon, pengalaman sane dahat kaelingin pisan wantah rikala dane kanikayang mangda mendekorasi hotel rikala pamadegan presiden sane kaping-43 Amerika Serikat George W. Bush simpang ring Bali ring warsa 2006 sane riin.
Rikala punika, dane ngaturang dekorasi sane makanten kesan alam Indonesia antuk ngawigunayang buah miwah bunga lokal sane mentik ring sajebag daerah Indonesia, silih sinunggilnyane wenten ring Bali.
Silih sinunggil ciri khas rangkaian bunga sae dados daya tarik karya Didon wantah nganggen dadaunan Lokal khas flora Bali, silih sinunggilnyane janur. "Yening bunga sane indah-indah tur ngalangenin, ring dura nagara akeh pisan. Yening dadaunan, iraga sane inggil. Duaning punika, titiang akeh pisan ngawigunayang dadaunan," dane wawewehin.
Antuk upaya kreatifitas, dadaunan sane kagabungang antuk bunga lokal sakadi gemitir, ratna, matahari, kembang seribu, jepun, miwah bunga/sekar sane tiosan kasulap dados rangkaian bunga sane jegeg pisan tur ngalangenin. Silih sinunggil ciri khas rangkaian bunga Didon wantah ngawigunayang janur/busung sane kawentuk apik pisan.
Workshop galahe sane mangkin ngangkat tema 'east meet west' utawi patemon kangin miwah kauh. "Tema puniki maderbe kasukseman, iraga ngawigunayang flora lokal sakadi janur miwah makudang-kudang sekar, nanging rangkaian sane kahasilang mamuat selera internasional," baosnyane.
Malarapan antuk pamargi sakadi puniki, Didon percaya pisan flora khas Bali pacang prasida bersaing ring kancah internasional.
Magabung sareng para pamilet workshop, Ibu Putri Koster taler nyihnayang kawagedan dane nguparengganin sekar mangda mauwah dados buket sane becik. (Balitopnews.com/Amo Bali).
Komentar