Gubernur Bali Nyarengin RRI Mautsaha Nyiatin Orti Tan Sujati
- 10 Oktober 2019
- 18:53 WITA
- News
Balitopnews.com, Denpasar
Orti sane tan sujati utawi hoax sane kasebarang masif ring media massa miwah media sosial ring galah pungkuran punika, sampun dados wicara sane dahating mabuat pisan. Saking panglimbak ortine punika, sampun prasida ngulgul rasa saling percaya, ngawe sentimen miwah rasa saling kaden/curiga, miwah nicapang manah tan seneng rauhin ngawe tur ngalimbakang konflik sane dahat ngaresresin pisan.
Duaning punika, peranan RRI pinaka lembaga penyiaran publik dahat kaperluang pisan sajeroning nangkal orti-orti hoax punika, baos Gubernur Bali Wayan Koster ring sajeroning sambrama wacanan dane sane kawacen olih Kepala Biro Human lan Protokol Bali AA Ngurah Oka Sutha Diana ring acara serah terima jabatan Kepala LPP RRI Denpasar saking Dra. Sophia Endang Widowati majeng ring Nawir Nwihu, S.Sos, maganah ring panggung terbuka Parahita RRI Denpasar, rahina Buda (9 Oktober 2019).
Makanten rauh ring parikrama punika, Ketua TP PKK Provinsi Bali Ibu Putri Suastini Koster, Direktur Keuangan RRI Hari Sudryanto, Ketua Umum FKUB sapisanan pinaka Bendesa Agung Majelis Desa Adat Provinsi Bali Ida Panglingsir Agung Putra Sukahet, anggota Forkompinda, kepala stasiun RRI seluruh Indonesia lan para uleman sane tiosan.
Gubernur Koster maosang, ring sajeroning ngalimbakang utawi nyebarang pelayanan informasi majeng ring krama, RRI Denpasar kaaptiang prasida ngicenin edukasi miwah upaya anggen ngaraketang hubungan sosial krama malarapan antuk siaran-siarannyane. "Pinaka lembaga penyiaran publik sane madue sifat independen, netral lan nenten komersial, RRI madruwe peran sane mabuat pisan sajeroning nolak tur 'meminimalisisr' panglimbak orti hoak ring pantaraning krama. Tur paindikan puniki dahating aptiang titiang," baos Gubernur Koster, negesang.
Gubernur maosang, RRI antuk sumber daya sane kadruenang prasida nincapang literasi media majeng ring krama sami, dadosnyane makasami elemen masyarakat/krama prasida narima, nyaring miwah ngawigunayang informasi antuk utsaha sane 'terkontrol' lan 'tersaring'.
Sajabaning kesiapan RRI sajeroning ngawentenang kerjasama sareng pemerintah nyiatin kawentenan hoaks, Pemprov Bali taler nyarengin lembaga penyiaran publik puniki anggen ngukuhang peran kontrol sosial, inggih punika nyiagayang ruang utawi waktu anggen ngawangun kesadaran krama sajeroning sareng-sareng mautsaha ngemit pamargin pawangunan daerah.
"Titiang taler mapangapti RRI prasida ngicenin kontribusi utawi sumbangsih sajeroning 'akselerasi' pawangunan ring Provinsi Bali, duaning RRI nenten wantah madrue tugas ngicenin hiburan, nanging mangda prasida taler ngobyahang orti sane 'akurat' lan 'aktual' indik pamargin pawangunan ring Provinsi Bali manut visi Nangun Sat Kerthi Loka Bali," baos dane negesang.
Ring sajeroning parikrama punika, Gubernur Koster taler maosang pamujinnyane sane kalintang tulus majeng ring pengabdian Ibu Sophia Endang Widowati rikala ngamargiang swadharma ring Denpasar. "Titiang ngaturang parama suksma ring sajeroning pangabdian lan kemampuan ibu ngawentenang kerjasama sareng Pemerintah Provinsi Bali rikala ngicenin informasi pamekas indik pawangunan. Majeng ring Bapak Nawir Nawihu titiang ngaturang rahajeng tugas, dumogi kerjasama iraga sane mangkin puniki prasida kakemit tur katincapang nyantos kapungkur wekas," baos dane.
Parindikan punika taler kasobyahang olih Direktur Keuangan LPP RRI, Hari Sudaryanto. Dane ngaturang pamuji ring sajeroning pengabdian miwah kerja keras Ibu Endang Widowati salamin dane dados Kepala Stasiun RRI Denpasar saking tigang warsa puniki. Dane mapangapti malarapan saking 'kepemimpinan' kepala stasiun sane anyar, kinerja RRI prasida katincapang miwah makta perubahan sane becik anggen kepentingan instansi.
Napimalih, manut dane, ring aab sakadi mangkin sane miarsayang RRI kantun akehan mayusa 40 warsa langkung. "Indik puniki wantah parindikan sane patut uratiang iraga sareng sami, paridabdab kadi asapunapi sane patut margiang iraga angge nuldul kahyun para yowana-yowana utawi anak muda," baos dane ngelingang.
Selehin ring kakuub umumnyane, RRI ring warsane sane jagi rauh puniki sampun nganrincikang Renstra, sane silih sinunggilnyane madaging indik riset radio. "Sapunapi 'respon' saking sang sane miarsayang saking dumun rauhing mangkin indik RRI, miwah kepuasan krama, dadosnyane iraga prasida nyusun lan nentuang program salanturipun," baosnyane. Malih sane mabuat dane ngawewehin sampun polih mabligbagan sareng Kemenlu mangda kadadosang siaran ring dura nagara. "Tatujon iraga sareng sami wantah mapangapti ngenalang ragam kebudayaan Indonesia majeng ring sang sane miarsayang sane magenah utawi jenek ring luar negeri," baos dane nalatarang.
Serah terima jabatan punika sampun manut ring SK Direktur Utama Lembaga Penyiaran Publik No: 1733 warsa 2019 indik pengangkatan PNS struktural. Serah terima jabatan puniki kamargiang, duaning Kepala Stasiun RRI Denpasar sane kagentosin sampun ngaranjing usia pensiun. Ring tepengan punika Ibu Putri Koster prasida rauh tur polih galah ngaturang cendramata marupa endek patra sane wantah pinaka produk kerajinan asli ring Provinsi Bali. (Balitopnews.com/MD/Amo Bali)
Komentar