Ibu Putri Koster Mapinunas Majeng ring Krama Perantauan Desa Jati Sampunang 'Mengkristalkan' Angga
- 04 November 2019
- 04:47 WITA
- News
Balitopnews.com,Kendari
Ketua TP PKK Provinsi Bali, Ibu Putri Koster polih nyelagang galah mangda simpang ring perkampungan masyarakat utawi krama Bali ring Kendari sane mawasta Desa Jati Bali sane magenah ring Kecamatan Ranometo, Kabupaten Konawe Selatan, duk rahina Radite (3 November 2019) ring sela-sela sadurung mawali jagi budal ke Pulo Dewata.
Ring sajeroning simakrama singkatnyane, Ibu Putri Koster dahat bangga tur ngaturang pamuji antuk rasa karaketan tur sagilik-saguluk krama Bali sane magenah ring Desa Jati Bali. Pinaka upaya anggen terus ngemit tur ngawerdiang kerukunanan pantaraning krama Bali lan krama lintas agama sane wenten ring perantauan duaning punika Putri Koster mapangapti majeng ring krama mangda nenten 'mengkristalkan' angga, dadosnyane prasida berbaur utawi menunggal sareng krama sane tiosan tur kahuripan saling ngemit miwah gotong royong prasida terus mamargi becik.
Langkung ring punika, Ibu Putri Koster taler mapangapti majeng ring krama mangda terus ngamargiang ajaran Tri Hita Karana, dadosnyane keharmonisan paiketan soang-soang individu utawi jadma sareng Ida Sang Hyang Widhi, sareng pantaraning krama, miwah sareng wawidangan palemahannyane prasida mamargi becik. "Ring sajeroning iraga mautsaha nyegjegang adat lan budaya Bali, nanging yening magenah ring rantauan iraga taler patut nyungkemin adat lan budaya sane sampun wenten, dadosnyane inggian napi sane prasida kajangkepin utawi kakolaborasiang sapatutnyane prasida kakolaborasiang dadosnyane prasida iraga maurip sareng-sareng antuk kahanan sane rukun, trepti, tur saling nyungkemin," baosnyane.
Tios ring punika, Kepala Desa Jati Bali Made Arnawan, nguningayang rasa suksemannyane antuk sapangrauh saking Ketua TP PKK Provinsi Bali. Dane maosang inggian Desa Jati Bali sampun kawentuk saking warsa 1068 tur daweg punika sampun maderbe 300 KK. Tiosan ring punika, sane mangkin Desa Jati Bali sampun kakukuhang pinaka Desa Adat lan Budaya ring Kabupaten Konawe Selatan.
Malarapan antuk punika, ngamargiang sasana tur swadharma pinaka desa adat, deweknyane pacang terus malajah mapaiketan ring sajeroning indik sapunapi cara utawi pamargi rikala ngawangun desa adat sane becik, tur sarahina nenten pacang lepas nunas ajah-ajahan utawi bimbingan saking Pemerintah Provinsi Bali pamekas Gubernur Bali. "Duaning punika, titiang mapangapti pinaka krama sane magenah ring rantauan, Pemerintah Provinsi Bali nenten mangengsapang titiang, nanging tungkalikannyane nunas mangda kalinguang duaning sapunapi je kahanan titiang wantah bagian saking masyarakat Bali sane riinan sinarengan merantau ke tempat ini, baos dane negesang.
Parikrama sane mamargi singkat punika, makanten dahat prasida ngicenin makna tersendiri majeng ring krama Desa Jati Bali, miwah makasami krama dahat kalangen pisan antuk hiburan lagu miwah puisi saking Ibu Putri Koster. (Balitopnews.com/DW/Hms)
Komentar