Kejari Tabanan Nerima Hibah Gedung saking Pemkab Tabanan
- 06 November 2019
- 04:54 WITA
- News
Balitopnews.com, Tabanan
Pemerintah Kabupaten Tabanan nyerahang hibah gedung majeng ring Kejari Tabanan. Hibah sane merupa gedung punika kasukserahang olih Bupati Tabanan Ni Putu Eka Wiryastuti lan katerima langsung olih Manggala Kejaksaan Negeri (Kejari) Tabanan Ni Wayan Sinaryati, rahina Anggara, (5/11) . Acarane punika taler kerauhin olih Manggala Kejaksaan Tinggi Bali Indianto, SH, MH, sane sepisanan ngeresmiang gedung punika kecihnain antuk pemotongan pita. Sioasan ring murdaning Jagat Tabanan, acara punika kesaksiang Sekda Kabupaten Tabanan I Gede Susila, Jajajaran Kejari Tabanan, taler manggala OPD ring wewidangan Pemkab Tabanan.
Murdaning Jagat Tabanan Ni Putu Eka Wiryastuti ring sambramawecanan dane ngaturang swasti prapta ring wewidangan Kabupaten Tabanan sane pinaka lumbung pangannyane Bali, mejeng ring Manggala Kejati Bali kesarengin rombongan.
Manut Eka Wiryastuti, panyukserahan hibah gedung punika cihna sokongan Pemkab Tabanan ring wewangunan ring bidang hukum ring wewidangan Tabanan. Siosan ring punika, hibah taler nyihnayang Pemkab Tabanan stata rumaket sareng kejaksaan rikalaning nitenin pemerintahan sane becik lan patut. Kategesang, gedung punika keaptiang sida ngelahang ayah-ayah ring widang ngajegang hukum ring wewidangan Bali khususnyane ring Tabanan.
Pantaring punika Manggala Kejaksaan Negeri Tabanan Ni Wayan Sinaryati ring sambramawecananyane maosang pinaka upaya ngemanggehang visi lan misi kejari pinaka lemaba penegak hukum sane profesional, transparan, lan akuntabel rikala ngendaliang wewidangan mestinyane ngemargiang sinergi sareng Forum Komunikasi Pimpinan Daerah (Forkompinda) mangda sinamian sida rumaket lan rukun.
Manut Sinaryati, panyukserahang hibah gedung pubika, kebuatang sida nyokong, nincapang lan ngelancarang rikala ngicenin ayah-ayah majeng ring krama.
Ring acara punika Manggala Kejati Bali Indianto, ngewewehin, pewangunan gedung punika pinaka wentuk kontribusi lan komitmen Pemkab Tabanan rikala ngemanggehin penegakan hukum khususnyane ring wewidangan Tabanan, mangda sayan becik lan berkualitas kantos selanturnyane. Indianto ngicenin dahat apresiasi lan suksma majeng Murdaning Jagat Tabanan sane sampun nyokong program Kejari Tabanan. Dane taler ngaptiang marwep ring Kejari Tabanan kasarengin jajaran mangda sida ngicenin ayah-ayah sane becik majeng ring Pemkab Tabanan angge ngujudang visi lan misi Pemerintah Kabupaten Tabanan. (Balitopnews. com)
Komentar