Ngukuhang Layanan Online Krama Adat, Gubernur Ngaturang Pamuji Pangrauh e-Link LPD-BPD Bali
- 11 November 2019
- 20:17 WITA
- News
Balitopnews.com, Denpasar
Gubernur Bali Wayan Koster ngaturang pamuji sajeroning inovasi sane kariptayang olih BPD Bali miwah LPD marupa layanan jasa keuangan online e-link LPD sane prasida ka-akses ngangge aplikasi ring ponsel pintar.
Indik puniki kasobyahang rikala ngarauhin Seminar Sinergi Bank BPD sareng LPD Sajeroning Ngawangun Perekonomian Daerah anggen Nangiang Visi Nangun Sat Kerthi Loka Bali Nuju Bali Era Baru miwah nerbitang aplikasi e-link LPD-BPD Bali magenah ring Inna Bali Beach Sanur, Denpasar, rahina Soma (11 November 2019).
Gubernur maosang utsaha marupa ngamedalang aplikasi e-link puniki wantah cihna sane becik duaning sakadi sane sampun kauningin LPD taler prasida nyarengin pakibeh manajemen organisasi antuk upaya sane modern malarapan antuk ngawigunayang teknologi informasi, inggih punika marupa e-link LPD. "Titiang mamanah indik puniki marupa utsaha sane becik pisan tur titiang ngaturang pamuji sajeroning pamargi sane kaambil olih BPD sareng LPD puniki," baos Ketua DPD PDI Perjuangan Provinsi Bali puniki.
Gubernur sane witnyane saking Desa Sembiran, Buleleng puniki terus ngukuhang komitmen mangda prasida nincapang peran desa adat silih sinunggilnyane LPD sane wantah bagian saking desa adat sane kapungkur wekas pacang kaanutang wastannyane dados Labda Pacingkreman Desa. "Kapungkur, (warsa-red) 2020 wantah jagi kalaksanayang aturan baru duaning sampun wenten Dinas Pemajuan Masyarakat Adat sane khusus nitenin saparindikan desa adat. Duaning punika, rikala kepala dinasnyane kalantik/kakukuhang, titiang pacang ngamargiang kordinasi mangda desa adat sane durung maderue LPD mangda digelis ngawentuk LPD," baos mantan anggota DPR RI puniki.
Dirut Bank BPD Bali I Nyoman Sudharma, SH.,MH maosang acara seminar miwah ngamedalang e-link LPD Bali puniki wantah rangkaian mikelingin HUT LPD sane kaping 35. Dane ngawewehin, yadiastun BPD nenten malih dados pembina miwah pengawas, nanging kerjasama pantaraning BPD sareng LPD kukuh pisan. "Indik puniki kacihnayang antuk ngenahang dana LPD sane wenten ring BPD Bali nyantos posisi Oktober puniki meh-mehan akehipun kirang langkung 4 triliun," baosnyane.
Manut dane, ngamedalang e-link LPD wantah bagian saking utsaha nincapang akses keuangan miwah inklusi keuangan pamekas majeng ring krama ring padesaan. "Tur malarapan antuk kerjasama puniki kaaptiang LPD ring sawewengkon Bali pamekas majeng ring krama sane magenah ring padesaan antuk digital banking prasida nganggen fasilitas BPD Bali," baosnyane ngaptiang.
Ketua BKS LPD Provinsi Bali Drs. I Nyoman Cendikiawan, SH., M.Si maosang antuk total aset sane akehipun 24,4 triliun wantah bukti sane nyata semeton krama Bali pamekas krama adat dahating sumeken pisan ring kawentenan LPD. Dane ngawewehin, ring widang IT pamekas ngarepin persaingan 4.0 ring aab sane mangkin, LPD taler sampun ngamargiang makudang upaya antuk standarisasi program komputer, kajangkepin antuk layanan sakadi LPD Mobile, PPOB miwah layanan sane tatujonnyane ngicenin pelayanan sane maksimal majeng ring nasabah. "(ngamedalang-red) e-link dahat titiang puji tur sampun janten jagi mawiguna sajeroning nincapang pelayanan majeng ring naabah sane maksimal," baosnyane nuturang. (Balitopnews.com/DW/Hms).
Komentar