Wagub Cok Ace Mapangapti majeng ring Para Kontingen FORMI mangda Ngukuhang Rasa 'Manyama Braya'
- 13 November 2019
- 21:10 WITA
- News
Balitopnews.com, Denpasar
Wakil Gubernur Bali Tjokorda Oka Artha Ardhana Sukawati, sane kaabih olih Plt. Kepala Dinas Pemuda dan Olahraga Provinsi Bali I Made Rentin, rahina Buda (13 November 2019) ngalepas kontingen Federasi Olahraga Rekreasi Masyarakat Indonesia (FORMI) Bali sane jagi ngamargiang Festival Olahraga Rekreasi Masyarakat Nasional (Fornas) V, ring Ruang Rapat Praja Sabha Kantor Gubernur Bali.
Ring acara punika, Wagub Cok Ace dahat muji semangat saking kontingen Bali mangda nyarengin parikrama sane bertaraf nasional punika. Manutnyane, olahraga rekreasi sajabaning pinaka ajang ngarereh para atlet taler kaanggen pinaka genah ngukuhang rasa pasemetonan sareng provinsi sane tiosan. Duaning punika, ida mapangapti para kontingen mangda prasida tetep ngemit rasa panyama brayan ring pantaraning wawidangan masyarakat nasional, dadosnyane kahanan indik persaingan rikala ngamargiang pacentokan prasida sayan 'cair', sehat tur janten prasida ngicenin semangat majeng ring pamilet sane tiosan. "Ring sajeroning pacentokan, sampun pastika sane dados unteng pangaptin iraga sami wantah mangda prasida dados jayanti, nanging kasukseman sane dahat mabuat nenten wantah punika, nanging sapunapi antuk mangda iraga prasida ngemit persatuan miwah ngawentenan pasemetonan sareng Provinsi Bali dadosnyane rikala iraga ngamiletin parikrama sane tiosan utawi rikala iraga ngemerluang punapa-punapi, wenten sawitra sane jagi ngawantu iraga," baos Wagub Cok Ace.
Tios ring punika, Koordinator Kontingen Tim Formi Bali I Gusti Ngurah Bagus Mataram ngaturang suksemaning manah majeng ring Pemerintah Provinsi Bali sane sampun nukung miwah ngicenin semangat majeng ring para atlet. Dane nguningayang inggian pacentokan Fornas sane kaping-V pacang kamargiang ring Samarinda-Kalimantan Timur, ngawit saking tanggal 15-18 November 2019. Nanging mapaiketan ring cabang olahraga sane kasarengin, inggih punika Tim Bali nyarengin 9 Cabor inggian punika panahan tradisional, enggarang, miwah 7 (pitu) cabang sane tiosan, silih sinunggilnyane nyarengin asiki exhibition antuk ngirimin kru komunitas layang-layang mangda prasida nyolahang layang-layang janggan ring konten sesi pertunjukan tradisional sajeroning parikrama punika. Dane mapangapti para pamilet prasida karahayuan miwah labda karya, lamakane prasida nyarengin pacentokan antuk pamargi sane becik tur sida taler ngamolihang hasil sane becik. (Balitopnews.com/DW/Hms)
Komentar