Ngalepas Kontingen Popnas, Wagub Cok Ace Mapinunas Majeng ring Krama Mangda Nukung Pembinaan Atlet
- 14 November 2019
- 19:23 WITA
- News
Balitopnews.com, Denpasar
Wakil Gubernur Bali Tjokorda Oka Artha Ardhana Sukawati ngalepas kontingen Bali sane jagi macentok ring Pekan Olahraga Pelajar Nasional (POPNAS) kaping-XV warsa 2019 ring Aula Dinas Pendidikan, Denpasar, rahina Wrahaspati (14 November 2019).
Ring sajeroning sambrama wacanannyane, Wagub sane akrab kapesengin Cok Ace maosang pinaka krama sane naenin dados pengurus olahraga Pancak Silat, Ida nyingakin langsung kawentenannyane meweh pisan para atlet rikala latihan. "Rikala sane tiosan polih galah malancaran ke swalayan, ipun adik-adik iraga sami, putran-putran iraga sedeng latihan, madengdeng (makebus-kebusan-red), maujanan, miwah sakancannyane," baos anak lanang sane naenin kajudi dados Ketua Persatuan Seni Pancak Silat Bakti Negara Bali. Manut ida Pemerintah Provinsi Bali ngarestitiang kaselamatan miwah kalabdakaryan para atlet, sajabaning ngicenin dukungan inggian marupa moral miwah material.
POPNAS inggih punika parikrama majeng ring soang-soang sekolah mangda nyihnayang kemampuannyane ring widang olahraga. Wagub Cok Ace maosang nenten sami sekolah madrue kemampuan miwah sumber daya sane setara sajeroning ngawerdiang miwah nitenin utawi membina olahraga para sisya. "Titiang mapangapti miwah nyarengin makasami elemen masyarakat utawi krama mangda sareng-sareng nukung sakancan utsaha anggen nincapang pembinaan kapungkur wekas," baos tokoh Puri Ubud puniki. Manutnyane Pemprov Bali nukung sakancan utsaha anggen nincapang kualitas pembinaan pelajar. Sajabaning punika, Plt. Kepala Dinas Pemuda dan Olahraga Provinsi Bali I Made Rentin maosang wenten 101 diri atlet sane kaabih olih 25 pelatih miwah ofisial dados kontingen Bali ring sajeroning jagi ngamiletin POPNAS XV ring Jakarta tanggal 15 nyantos 25 November 2019. Saking 13 cabang olahraga (cabor) sane jagi kacentokang Bali nyarengin 11 ring widang saking makasami punika. "Wenten kalih cabor sane sayuwakti iraga wantah ngaranjing ring peringkat ketiga dadosnyane nenten mengirim wakil ring widang punika. Kapungkur saking titiang Dinas Pemuda Olahraga Provinsi Bali pacang mamargi sinarengan sareng kabupaten/kota mawali pacang ngicenin semangat mangda cabor sane jagi kacentokang samampuhnyane makasami prasida kamiletin," baos pejabat saking Mengwi puniki. (Balitopnews.com/DW/Rls)
Komentar