Balitopnews.com, Denpasar 

Gubernur Bali, Wayan Koster mapinunas majeng ring krama Bali sareng sami mangda sareng-sareng ngalabda karyanin pemilu serentak warsa 2019. "Ngiring iraga nyaga tur nincapang kahanan sane trepti, aman miwah damai tur nyemit Taksu Bali ring ajeng masyarakat Nasional miwah Internasional," baos dane Gubernur ring ajeng para wartawan utawi awak media magenah ring kawasan Jayasabha, Denpasar, Kamis (4/4) inuni siang. 

 

Gubernur Koster taler nyobyahang, indik punika sampun manut ring sapituduh Presiden Joko Widodo mangda tetep ngemit kahanan wawidangan miwah kramane rikala dina pencoblosan. "Cihnayang taler taksu miwah keadiluhungan Bali pinaka pulau sane madue peradaban antuk budaya sane utama, tur pinaka destinasi pariwisata dunia," kadi asapunika baos dane Wayan Koster rikanjekan punika kaabih taler olih Ketua Majelis Utama Desa Pakraman (MUDP) Jero Gede Suwena Putus Upadesa miwah Ketua PHDI Bali Prof. I Gusti Ngurah Sudiana. 

Tios ring punika, Ketua DPD PDI Perjuangan Bali puniki taler mapinunas majeng ring krama sinamian mangda ngawigunayang hak pilih pinaka warga negara anggen memilih para manggala utawi guru wisesa sane pinaka pemucuk ngarajegang jagat. " Ngiring sareng sami sane madruwe hak pilih mangda rauh sareng-sareng ke TPS ring rahina 17 April rikanjekan pacang memilih presiden, wakil presiden, miwah wakil rakyat sane madruwe komitmen kuat nginggilang Ideologi Pancasila, UUD 1945, NKRI, miwah Bhineka Tunggal Ika," kadi asapunika daging pinunas Gubernur. 

 

Koster taler mapangapti majeng ring instansi pemerintah, perusahan, miwah lembaga swasta sane tiosan mangda sareng mendukung miwah ngicenin galah majeng ring karyawannyane anggen ngawigunayang hak pilih ke TPS-TPS sane sampun kacumawisan. "Majeng ring perusahan swasta titiang mapangapti mangda ngicenin galah sanistannyane ngicenin  jadwal shift majeng ring karyawannyane sane jagi ngawigunayang hak pilih," kadi punika pangaptin Wayan Koster. Dane taler maderbe target persentase utawi rarincikan pawilangan akeh krama sane sareng ngawigunayang hak pilih mrasidang nyantos 80% warsane sane mangkin. 

 

Ring galah sane pateh, Jero Suwena taler mapangapti majeng ring para Bendesa miwah Pecalang ring soang-soang Desa Pakraman mangda ngawantu para prawartaka utawi petugas ring sajeroning ngemit katreptian rikala dina pencoblosan. "Manut ring parindikan sane sampun kacumpunin sareng sami, sane sampun kacumpunin sadurung puniki mapaiketan ring utsaha ngalabda karyanin pemilu warsane sane mangkin," kadi asapunika baos Jero Suwena. 

Tios ring punika, Prof. Sudiana mapikeling majeng ring krama Bali mangda nenten golput duaning memilih sang sane kamanggehang pinaka guru wisesa punika silih sinunggil swadharmaning dharma nagara, swadharma sane mapikenoh anggen nentuang pakibeh pamargin panagarane. "Titiang mapangapti majeng ring para krama mustikannyane umat Hindu sane maderbe karya piodalan, sasida antuk mangda ngepah galahnyane lunga mencoblos ke TPS," sineb Prof. Sudiana.  (Balitopnews.com / Amo Bali )