Gubernur Koster Ngarauhin Konfrensi Internasional Tata Kelola Keuangan
- 10 Oktober 2019
- 21:12 WITA
- News
Balitopnews.com, Denpasar
Gubernur Bali Wayan Koster kasarengin olih Sekda Provinsi Bali Dewa Made Indra ngarauhin konfrensi internasional ngeninin indik tata kelola miwah akuntabilitas keuangan negara maka tatujon anggen nukung pawangunan 'berkelanjutan' sane kalaksanayang olih Badan Pemeriksa Keuangan (BPK) RI, rahina Wrahaspati (10 Oktober 2019).
Konfrensi internasional sane kalaksanayang ring Aula Petemuan Kantor Perwakilan BPK RI Provinsi Bali kadudonin antuk ngalinggatanganin prasasti pinaka cihna peresmian Balai Diklat Pemeriksaan Keuangan Negara (Balai Dilat PKN) BPK RI sane magenah ring Kabupaten Gianyar Bali.
Kawawancarayang risampune puput acara pembukaan miwah palinggatanganan prasasti, Gubernur sane taler menjabat pinaka Ketua DPD PDIP Provinsi Bali puniki ngaturang pamujinnyane majeng ring kawentenan Balai Diklat PKN. Manut dane, indik puniki wantah utsaha sane becik pisan anggen nincapang kualitas SDM pamekas jajaran lembaga pemeriksa keuangan. "Dahat mapikeno pisan anggen nincapang kemajuan kualitas SDM," baos dane cutet.
Tios ring punika, Ketua BPK RI Moermahadi Soerja Djanegara ring sajeroning sambrama wacanan dane maosang inggian konfrensi puniki wantah genah saling matimbang wirasa indik makudang-kudang pengetahuan miwah pengalaman sane mapaiketan ring isu-isi utawi wicara-wicara pawangunan 'berkelanjutan' majeng ring para pejabat utawi sane ngawasa-wasi inggian parindikan punika.
Langkungang ring punika, parikrama puniki taler dados genah/forum fasilitas ngalimbakang ilmu pengetahuan ring widang pengelolaan keuangan negara anggen nukung sarengnyane para 'pemangku kepentingan' ring sajeroning utsaha ngawentenang pawangunan sane 'berkelanjutan'. "Kontribusi puniki wantah cihna kontribusi BPK RI anggen nukung pawangunan sane 'berkelanjutan' malarapan antuk panureksan," baos dane.
Moermahadi ngawewehin, ngawit warsa 2016, BPK RI sampun magabung dados siki sareng INTOSAI Knoledge Sharing Committeee (KSC) lan INTOSAI Development Intiative (IDI) ring sajeroning program ngalimbakang kapasitas pemeriksaan tatujon pawangunan 'berkelanjutan'.
Ring galah punika, Moermahadi taler maosang indik kawentenan Balai Diklat PKN BPK RI. Manut dane, kawentenan balai diklat puniki wantah cihna komitmen BPK RI manut mandat lan visi BPK RI mangda ngalimbakang sumber daya manusia sajeroning ngemit tata kelola keuangan negara.
Konfrensi kamiletin olih para panureksa (auditor), peneliti, perwakilan pemerintah daerah, asosiasi profesi IAI, IIA, IAPI, ISACA, CPA Australia. Tios ring punika taler tampil pinaka narawakya inggih punika Deputi Bidang Kemaritiman lan Sumber Daya Alam Bappenas Arifin Rudiyanti, Dekan Fakultas Ilmu Administrasi Universitas Indonesia Eko Prasojo, Jane Maede saking Grup Executive Director in the Professional Service and Relationships Group on The Australian National Office lan Attorney VI Commision on Audit of the Republic of the Philippines Javien D. Ompoc.
Ring sajeroning materi sane kabaosang, para narawakya maosang indik peran soang-soang pinaka pemerintah, akademisi, lan lembaga panureksa sajeroning nukung tata kelola lan akuntabilitas anggen ngawentenang pawangunan sane 'berkelanjutan'.
Parikrama pemungkah konfrensi kacihnayang antuk nepak gong olih Ketua BPK RI kaabih olih Gubernur Bali Wayan Koster. (Balitopnews.com / MD / Amo Bali )
Komentar