Nyineb Tugas ring Indonesia, Konjen Jepang Ngelungsur Mepamit Sareng Gubernur Bali Wayan Koster
- 23 April 2020
- 22:04 WITA
- News
DENPASAR, Balitopnews.com - Gubernur Bali Wayan Koster nampa Konsul Jenderal (Konjen) Jepang ring Denpasar Hirohisa Chiba ring rumah jabatan Jaya Sabha, Denpasar ring Respati (23 April 2020).
Duk punika Konjen Chiba ngelungsur mepamit santuk dane pacang nyineb jabatanne ring Indonesia ring 3 Mei 2020 sane rauh.
Gubernur Koster taler ngaturang suksema antuk kasinarenganne lan pasuwitran sane memargi 4 warsa jabatan Konjen Chiba ring Bali.
Tiosan raris Konjen Chiba taler nyumbungan antuk kasagayang lan pemargi sane kalaksanayang Pemerintah Provinsi Bali rikala nambakin pandemi virus Covid-19.
“Titiang nyuksemayang antuk pemargi-pemargi Pemerintah Provinsi Bali malarapan Gugus Tugas (Gugus Tugas Percepatan Penanganan Covid-19 Provinsi Bali, red) sane manut titiang sampun ngirangin panglimbak virus Corona ring Bali. Tiosan saking punika titiang taler ngarsayang wenten sane ngabih Bali,” baos Konjen Chiba.
Ring galah punika, Gubernur Koster taler nyukserahang cinderamata majeng Konjen Chiba marupa gegambaran macihna Bali sane malelampahan reringgitan.
"Titiang ngaturang agung suksemaning manah antuk kasinarenganne sane sampun memargi. Dumogi benjang pungkur pasuwitran Bali sareng Jepang ngangsan reket," teges Gubernur Koster.
Raris indik Covid-19, Gubernur Koster ngaturang angayu bagya pengelimbakanne kedik lan dumogi 4 diri sane padem (2 WNA lan 2 WNI, red) nenten malih maweweh.
"Ring Bali pangelimbak transmisi lokal kaucap kedik lan makehan kasus positif (Covid-19, red) rauh saking imported case utawi kalalahin ring dura Bali," Gubernur Koster ngawewehin.
Gubernur Koster negesan, tiosan kasagayang saking Gugus Tugas, dane taler dahat ngandelan desa adat pinaka baga sane prasida ngemargiang pituduh pemerintah lan dahat urati nambakin virus Covid-19 ngelalah.
"Tiosan saking wenten indik niskala yang sane ngabih Bali," ucap Gubernur Koster.
Tiosan raris Konjen Chiba maosan sokongan lan pasuwitran sane kaicen Gubernur Bali, jajaran lan krama Bali dahat maaji sekantun dane ngemargiang tugas ring Bali.
"Gargita pisan presida 4 warsa kajodi ring Bali. Titiang pacang setata mautsaha ngeraketan pasuwitran kalih panegara sekadi sane sampun margiang titiang," teges dane.
Kabaosan, makeh parindikan sane katulad ring Bali minakadi indik adat istiadat, tradisi lan budaya Bali miwah taler ngawewehin pasuwitran.
"Titiang ngaptiang, antuk sregep lan kasayagayang Bali antuk kawwntenan Covid-19, makasami pacang gelis mewali sekadi jatimula. Benjangan titiang pacang sering rauh ke Bali pinaka tetujon utama titiang malila cita sareng kulawarga," sineb dane. (Balitopnews.com/md/rls)
Komentar