‘Pemprov Bali Hadir’, Nyukserang Wantuan Bedah Rumah Majeng Kalih Warga Kirang Mampu ring Buleleng
- 08 April 2024
- 23:04 WITA
- News
BULELENG, Balitopnews.com - Penjabat (Pj) Gubernur Bali S.M Mahendra Jaya kadampingin Ketua TP. PKK Provinsi Bali Ny. drg Ida Mahendra Jaya nglaksanayang parikrama ngenahang batu pertama wantuan bedah rumah program "Pemprov Bali Hadir" majeng Ketut Yudi Astrawan krama Banjar Dinas Bululada, Desa Selat, Kecamatan Sukasada, Buleleng rahina Soma (8 April 2024) semeng.
Wantuan kemanusiaan "Pemprov Bali Hadir" puniki pinaka wentuk uratian Pemerintah Provinsi Bali majeng krama kirang mampu.
Ketut Yudi Astrawan, nerima wantuan bedah rumah aksi Ngrombo saking Badan Pendapatan Daerah Provinsi Bali, puniki ngaturang suksma majeng Pj. Gubernur Mahendra Jaya sane rauh ngicenin uratian majeng kulawargannyane.
"Suksma majeng pak Pj. Gubernur sane sampun ngicen tiang wantuan. Suksma antuk uratian Pemerintah Provinsi Bali," atur anak lanang sane maderbe kakalih pianak puniki.
Parindikan sane pateh taler kabaosang Perbekel Desa Selat Putu Mara ngaturang suksma antuk uratian Pj. Gubernur Bali majeng silih tunggil kramannyane. Dane matutang yening Ketut Yudi Astrawan pinaka warga kirang mampu sane ngarahina dados buruh serabutan. Tios punika, ngarahina Yudi sareng kurenan nyane miara kalih pianak ipun sane disabilitas.
Dane nlatarang "Kraman titiang puniki silih tunggil krama sane munggah ring Data Terpadu Kesejahteraan Sosial (DTKS). Pakaryan ipun (lanang -istri) serabutan. Titiang ngaturang suksma, iwau Pak Pj. Gubernur sampun ngamargiang peletakan batu pertama wantuan bedah rumah. Wantuan puniki mapikenoh pisan majeng kraman titiang," .
Salanturnyane ring galah sane pateh, Pj. Gubernur Mahendra Jaya taler ngenahang batu pertama wantuan bedah rumah program "Rumah Sejahtera Terpadu" majeng Putu Widana Yasa krama Banjar Dinas Dangin Pura Desa Panji, Kecamatan Sukasada, Buleleng.
Wantuan Ngrombo saking Satuan Polisi Pamong Praja miwah Biro Umum dan Protokol puniki, kaicen santukan Putu Widana Yasa sane pakaryan ipun serabutan, maderbe genah sane nenten layak huni nenten madaging listrik miwah nenten maderbe kamar mandi, antuk (4) diri anggota keluarga (taler wenten rare sane wau mayusa 4 bulan).
Sang polih wantuan rumah, Putu Widana Yasa nyuksemayang pisan wantuan saking Pemerintah Provinsi Bali, sane sampun urati ngicen wantuan bedah rumah saking program rumah sejahtera terpadu puniki.
Parikrama ‘Pemprov Bali Hadir’ kala puniki taler karauhin antuk Sekretaris Daerah Provinsi Bali Dewa Made Indra, Pj. Bupati Buleleng Ketut Lihadnyana miwah Kepala Perangkat Daerah ring wawidangan Pemerintah Provinsi Bali miwah Kabupaten Buleleng. (Rls/Btnc)
Komentar