Ny. Putri Koster Nangian Istri-istri WFH Mangda Pekaranganne Katandurin Jejanganan lan Nyayagayang 125 Ton Beras Majeng Krama Katampis Covid 19
- 24 April 2020
- 20:04 WITA
- News
DENPASAR, Balitopnews.com - Ketua Tim Penggerak PKK Provinsi Bali Ny. Putri Suastini Koster nguningan PKK Provinsi Bali sampun nyayagayang 125 ton beras lokal sane pacang kasobyahan majeng krama, utamane sane tuara.
Tiosan saking punika, antuk tetujon nagingin Work From Home (WFH), Ny. Putri Koster nangiang istri-istri PKK ngangge pekarangan pakubonanne antuk nandur jejangan lan tetaneman tamba kulawarga.
Indik punika kategesan duk dialog interaktif indik Peran PKK Melalui Program Hatinya PKK antuk kawentenan gering Covid-19 sane memargi ring stasiun TV lokal Bali, Suka (24 April 2020).
Ny. Putri Koster negesan, dane sampun ngarembug sareng PKK kabupaten/kota mangda nangian PKK ring desa utawi pare perbekel mangda nyukserahan cakepan majeng provinsi indik sane patut polih wantuan beras.
"Titiang nenten pilih kasih, titiang nyukserahang majeng desa mangda nyurat kramane sane patut, santukan desa sane uning indik kramane, dadosne cakepan sane polihan titiang patut sekadi kawentenanne," baosne.
Ny. Putri Koster malih negesan kawentenan PKK ring pakurenan dahat mabuat majeng kulawarga. Munggwing asapunika, PKK medue 10 program pokok. Sinalih tunggilne Hatinya PKK inggih punika Halaman, Asri, Teratur, Indah lan NYAman miwah Bermanfaat.
Saking warsa 2019 minakadi saking pengawit kalantik dados Ketua PKK Ny. Putri Koster sutindih ngemargiang program Hatinya PKK ring makasami kabupaten/kota ring Bali. Manut dane, hatinya PKK puniki medue kawigunan utama rikala nangian kemandirian krama anggen nagingin ilen-ilen unteng, utamane baga pangan. Munggwing asapunika ngawit warsa 2019, Ny. Putri Koster tedun ke desa-desa nyobyahang indik tetanduran sane manut hatinya PKK.
Ny Putri Koster setata ngelingan kramane mangda pekaranganne mawiguna, minakadi cupit utawi jimbar antuk nandur sekadi jejanganan, tabia, kunyit, serai lan basa. Tiosan malih, pekarangan taler presida kaangge nandur sekar anggen lakar canang. Yening krama istrine urati ngembangan Hatinya PKK sepatutne kala masan gering corona puniki nenten meweh ngerereh ajeng-ajengan, setios nandur ring pekarangan taler presida taet matumbasan.
"Becikne yening sami presida gotong royong sekadi puniki,” baos dane.
Tiosan saking punika manut dane, kawigunan saking Hatinya PKK inggih punika tetanduranne nenten ngangge pestisida utawi pengawet, dadosne vitamin sane kapolihan becik majeng angga.
Munggwing asapunika, Ny Putri Koster nangiang kramane sami mangda galah WFH puniki kaangge ngaryanin sane patut kakaryanin, sinalih tunggilne nanemin pekarangan rumah antuk jangan utawi taneman tamba kulawarga utawi basa. Kantos raris 'work from home (WFH) nenten wantah kaangge maplalian gadget utawi indik nenten mabuat.
Tiosan raris Kepala Dinas Pertanian dan Ketahanan Pangan Provinsi Bali Ida Bagus Wisnuardhana negesan kawentenan pangan ring Bali kantos Desember 2020 kantun wenten.
Wantah kesuna bawang putih lan bawang sane kirang santukan durung galah manyi sakemaon Dinas Pertanian dan Ketanahan Pangan sampun medue pemargi mangda bawang lan kesuna nenten meweh karuruh.
"Mangda ajinne nenten ngemaelan ring masan pandemi Covid-19 puniki lan sadurung hari raya Idhul Fitri titiang sampun nangian tim satgas ketahanan pangan antuk tetujon ngontrol pasokan dan aji kebutuhan pokok ring lapangan miwah ngerauhan sanksi yening wenten oknum sane mekarya nenten manut," sineb dane. (Balitopnews.com/md/rls)
Komentar