Pemprov Bali Ngangken Nenten Wenten Nulak KM Splendor Nedunan PMI Saking Bali ring Pelabuhan Benoa
- 25 April 2020
- 19:04 WITA
- News
DENPASAR, Balitopnews.com - Orti indik Kapal Motor (KM) Carnival Splendor sane makta buruh migran Indonesia utawi PMI ketulak ring pelabuhan Benoa Sukra (24/4) kategesan nenten wenten olih Gubernur Bali Wayan Koster. Ring pemargi tele conference sareng Kapolda Bali Irjen Pol Petrus R Golose serta Pangdam IX/Udayana Mayjen TNI Benny Susianto, Kejati Bali Idianto SH MH lan Tim Gugus Tugas Percepatan Penanganan Covid-19 Provinsi Bali antuk tetujon nincapan pemargi antuk kawentenan Covid-19 ring ruang rapat Gedung Gajah, Jayasabha Denpasar, Saniscara (25/4).
Gubernur Koster teges nguningan indik punika. Dane ngangken nenten wenten Pemprov Bali nulak sapangrauh kapal inucap.
"Kapal nenten simpang ring Benoa. Kapertama, santukan durung wenten izin saking pusat. Kewenanganne wenten ring pusat boya Bali. Kaping kalih, manut keputusan Gugus Nasional, ngangsan armada sane ngelintang ring segara, tedunne ring Tanjung Periok. Kakekeb derika ring Jakarta. Puniki pinaka keputusan Gugus Tugas Nasional melarapan protokol Kemenlu, Gugus Tugas Nasional dan Kementerian Perhubungan. Dadosne sapangrauh kapal pesiar sane makta angga PMI pinaka kewenangan pusat lan mangkin sampun kaamongin olih Gugus Tugas Pusat," teges Gubernur Koster.
KM sane kaorti ngambang ring wewidangan Karangasem punika manut Gubernur Koster mangkin sampun tedun ring pelabuhan Tanjung Priok, antuk tetujon ngemolihan pemargi manut pulah palih saking kawentenan Covid-19.
"Santukan sampun kaamongin olih Gugus Tugas pusat, janten sampun ngelintangin jalur khusus sane manut sekadi derika inggih punika simpang ring Tanjung Priok. Selanturnyane para angga kapal pacang nyarengin rapid tes lan kakekeb,” dane ngawewehin.
Ring genah lan galah sane pateh, Kepala Dinas Perhubungan Provinsi Bali IGW Samsi Gunarta negesan, indik repatriasi PMI/ABK pinaka kewenangan Gugus Tugas Covid-19 Nasional.
“Keputusan simpang nentenne kapal pesiar antuk repatriasi PMI ring pelabuhan sane kajodi pinaka kewenangan Gugus Tugas Covis-19 Nasional sesampun kaajuan pinunas olih Ditjen Konsuler dan Protokol Kementerian Luar Negeri Kepada Gugus Tugas Nasional. Gugus Tugas Provinsi nenten pemutus antuk genah ngeranjing sane kaangge repatriasi. Iraga ring provinsi setata nyayagayang kapasitas sami anggen nyayagayang keputusan-keputusan punika," ucap dane lan negesan sadurunge Pemerintah Provinsi Bali sampun polih nampa sapangrauh PMI/ABK sane simpang utawi tedun ring Benoa manut keputusan Gugus Tugas Percepatan Penanganan Covod-19.
Samsi Gunarta ngelanturang, Gugus Tugas Nasional janten sampun ngemanahin saking aspek sami utamane indik gelis lan elah ngambil pemargi nureksa pangelimbak Covid-19 ring daerah manut cakepan sane presida kapupulan ring nasional. (Balitopnews.com/gix)
Komentar