Pertamina lan Hiswana Migas DPC Bali Nyukserahang Wantuan Sembako
- 27 April 2020
- 21:04 WITA
- News
DENPASAR, Balitopnews.com - Wakil Gubernur Bali Tkorjorda Oka Artha Ardhana Sukawati kaabih olih Kepala BPBD Provinsi Bali Made Rentin, Soma (27 April 2020) magenah ring Kantor Gubernur Bali, antuk pemargi simbolis nampa wantuan sembako sane kautserahang olih Pertamina lan Hiswana Migas DPC Bali.
Wagub Cok Ace ring galah punika ngaturang suksema antuk wantuan saking Pertamina lan Hiswana Migas. Manut dane, wantuan sekadi puniki dahat mawiguna rikala kondisi jagate sekadi mangkin. Taler ngelingin makeh krama sane keni PHK mawinan Pemprov setata nganyarin cakepan sane patut polih wantuan. Munggwing asapunika, Wagub Cok Ace nyantenan Pemprov Bali melarapan Dinas Sosial lan BP3A Provinsi Bali, BPBD Provinsi Bali lan PHRI sane mangkin kantun mautsaha mecikang cakepan, kantos nenten wenten krama sane tuara sane nenten polih wantuan.
"Dadosne titiang ngemanahin wantuan punika adil lan pateh mangda nenten mabinayang. Munggwing asapunika Bapak Gubernur Bali taler sampun ngamedalan instruksi majeng bendesa adat se-Bali mangda ngaryanin cakepan, mangda benjang wantuan-wantuan sane rauh mabasis data sane yukti sekadi kawentenanne," baosne.
Antuk pemargi sekadi punika, Sales Area Manager Pertamina Retail Bali Deni Sukendar igum sareng pemargi Pemprov Bali punika. Manut dane, mangkin cakepan sane becik dahat mawiguna mangda kramane polih wantuan pateh lan nenten mabinayang. Munggwing asapunika, dane maosan mangkin punia sane kautsahayang marupa alat kesehatan, peralatan pendukung lan 500 pcs paket sehat sembako sane katumbas saking pare petani ring Bali sane nedeng panen raya pinaka upanaya ngewantu perekonomian pare petani Bali.
Punia sane kautserahang puniki pateh sareng jinah 125 yuta rupiah lan pacang kautserahang majeng Pemprov Bali sane selanturne pacang kaenteran olih Satuan Gugus Tugas Penanganan Covid-19.
Dane taler nguningan indik upanaya nambakin Covid-19, Pertamina lan Hiswana Migas taler sampun nyedyayang wastafel portable lan penyemprotan ring makasami sarfas SPBU lan LPG serta miwah ngedukung upanaya ring pakubon kemanten antuk ngelaksanayang delivery service BBM lan LPG. Dane ngaptiang, antuk upanaya ring kawentenan covid-19 sane puniki presida munggel pangelimbak virus puniki.(Balitopnews.com/gix)
Komentar