Gubernur Koster Nguningan Raperda Indik Rencana Umum Energi Daerah Provinsi Bali Warsa 2020-2050
- 29 Juni 2020
- 20:06 WITA
- News
DENPASAR, Balitopnews.com. Kawentenan kelistrikan eksisting ring Bali warsa 2019 medue kapasitas mapasang saking makasami pembangkit ring Bali 1.440,85 MW. Raris daya presida sane kapolihang 927,20 MW, raris tategenan pinih tegeh kajujur 920 MW. Dadosne yening kabandingan antuk daya presida raris kawentenan cadangan kelistrikan ring Bali wantah 0,77% lan puniki pinaka kawentenan dahat kritis santukan cadangan sebecikne 30% saking tategenan pucak.
Tiosan ngawigunayang energi anggen nangian listrik, energi taler kaangge ring sektor tiosan utamane ring baga transportasi, komersil, industri, pakubonan lan baga tiosan, utajane sane nukung pariwisata. Antuk kawentenan punika raris Pemerintah Provinsi Bali ngajuang Raperda indik Rencana Umum Energi Daerah Provinsi Bali warsa 2020-2050 (RUED-P), kantos pungkuran Bali Mandiri Energi presida kajujur.
Asapunika kaodar Gubernur Bali Wayan Koster ring paruman paripurna ke-6 Masa Persidangan II warsa Sidang 2020, ring Gedung DPRD Provinsi Bali, Soma 29 Juni 2020.
"Kamanah antuk titiang janten sampun galahne iraga nenten ngandelang malih sareng dengan tiosan, iraga patut newek indik energi resik. Munggwing asapunika puniki janten sampun nesek lan patut iraga surat sane karencanayang mangda iraga taler presida nambakin byuta pungkuran. Dadosne titiang nunas pikaryan sareng saking anggota dewan mangda gelis maosan indik raperda puniki sane raris keajuan ke pusat," ucap Gubernur Koster sane taler pinaka Ketua DPD PDI Perjuangan Provinsi Bali.
Indik raperda Rencana Umum Energi Daerah Provinsi Bali Tahun 2020-2050 (RUED-P) sane dados sinalih tunggil unteng bebaosan ring sidang punika, Gubernur Koster nguningan indik raperda punika pinaka amanat Pasal 18 Undang-Undang Nomor 30 Tahun 2007 indik Energi lan pasal 16 ayat (5) Peraturan Presiden Nomor 1 Tahun 2004 indik Pedoman Penyusunan Rencana Umum Energi Nasional. RUED-P pinaka dokumen parencana energi Bali warsa 2020-2050 sane nyurat pemargi lan ngelola energi bersih ring Bali. RUED-P matetujon anggen ngabih kesucian lan kasukerthan palemahan Bali manut sareng visi “Nangun Sat Kerthi Loka Bali” rikala nangian Pulau Bali sane resik, gadang lan luwih antuk ngewangun sistem energi resik sane ramah lingkungan sane kajiwain olih sasikut Tri Hita Karana sane rauhne saking nilai-nilai kearifan lokal Sad Kerthi ring asiki wilayah, siki pulau, satu pola, lan siki tata titi ngamongin.
RUED-P mungguhang sakirangne inggih pubika indik orti lan pikobet energi. Kawentenang energi daerah ring galahe mangkin, kawentenang energi daerah pungkuran, awig lan parencana energi daerah, program lan parikrama nincapang energi resik daerah lan kelembagaan energi daerah.
Gubernur saking Sembiran Buleleng puniki taler negesan indik raperda punika pinaka produk hukum sane nyurat dokumen perencanaan energi iragane, kapertama ring Indonesia sane kasurat antuk ngutamayang ngangge energi resik sane matetujon mangda Bali mandiri energi, ngelantur lan adil antuk setata nyujur tetujon nasional inggih punika antuk maundag lan pastika nincapan ngadukan energi kaanyarin, sane galah mangkin wantah 0,4 % pacang nincap dados 11,15 % ring warsa 2025 lan dados 20,10 % ring warsa 2050.
“Kejantenan ring pemargi benjangan taler kaadungan sareng tetincap ilmu lan teknologi ngawigunayang EBT lan taler nyarengan krama lan adat, dados dahat mabuat mangda iraga sinarengan minakadi eksekutif lan legislatif mangda ngabih lan ngelanturang rancangan peraturan daerah mangda presida kaangge sesikut rinh nincapan energi bersih ring Bali pungkuran," ucap dane.
Ring paruman paripurna punika taler maosan indik raperda Provinsi Bali indik Pertanggungjawaban Pelaksanaan Anggaran Pendapatan lan Belanja Daerah Semesta Berencana Provinsi Bali warsa anggaran 2019.(gix)
Komentar