HATINYA PKK Nangiang Egar Krama Desa Ulakan Metaneman ring KWT Laksmi Dewi
- 23 Agustus 2020
- 21:08 WITA
- News
KARANGASEM, Balitopnews. com- Gerakan HATInya PKK sane setata katangian olih Ketua TP PKK Provinsi Bali, Ny Putri Suastini Koster antuk tetujon mangda tanah pekarangan presida kaemong becik lan kawigunayang anggen nandur pangan lan tetaneman produktif sekadi jangan-janganan kantos lakar basa puniki kasanggra olih krama Banjar Dinas Tengah, Desa Ulakan, Kecamatan Manggis, Kabupaten Karangasem antuk nangian Kelompok Wanita Tani (KWT) Laksmi Dewi sane kasarengin 30 diri.
Indik punika kacingak dul Gubernur Bali, Wayan Koster ngelaksanayang kunjungan kerja, Redite (23/8) semeng ring Kelompok Wanita Tani Laksmi Dewi kaabih Sekda Provinsi Bali, Dewa Made Indra, lan Kepala Dinas Pertanian lan Ketahanan Pangan Provinsi Bali, Ida Bagus Wisnuardhana, miwah karauhin olih Wakil Bupati Karangasem, I Wayan Artha Dipa sareng Ketua DPRD Karangasem, I Gede Dana.
Duk punika Ketua Kelompok Wanita Tani Laksmi Dewi, Ni Ketut Sulaksmi sane kaabih Pembina, I Made Arta Dana nyaduang indik Kelompok Wanita Tani Laksmi Dewi puniki embas, santukan mireng wenten orti indik program HATInya PKK ring Provinsi Bali sane kamanah dane dahat mawiguna anggen nagingin kawentenan pangan ring pekraman napi malih ring kawentenan Pandemi Covid-19.
"Indik nyujur indik punika titiang mupulan krama, disampun mapupul saget spiritne pateh meled nangiang ketahanan pangan, kantos kelanturang Kelompok Wanita Tani Laksmi Dewi puniki sane kasarengin 30 diri," ucap Ni Ketut Sulaksmi apisanan ngodar karang sane kaangge pinaka karang 'Ayahan Desa' majimbar 44 are. Raris indik tetaneman sane katandur marupa kasela sawi, tomat, bayem, tabia, tuwung, timun, paya, kangkung, kelor, sere, jahe bang kantos pisang lan gedang.
Duk nganyi, Kelompok Wanita Tani Laksmi Dewi puniki nenten wantah ngedum pikolih anyinne minakadi jangan-janganan kantos woh-woh majeng anggotane. Sakemaon, baos Pembina KWT Laksmi Dewi, I Made Arta Dana pikolih anyine taler kaicen majeng krama tiosan anggen ngingana tategenan indik pangan ring pandemi Covid-19.
Tiosan raris Kepala Dinas Pertanian lan Ketahanan Pangan Provinsi Bali, Ida Bagus Wisnuardhana ring ajeng Gubernur Bali, Wayan Koster maosan kawentenang
Kelompok Pekarangan Pangan Lestari (P2L) lan Program HATInya PKK dahat sairing sareng awig Pemerintah Provinsi Bali sane medue misi inggih punika kasadiane pangan majenf krama Bal lan pinaka cihna memargine Peraturan Gubernur Bali Nomor 29 warsa 2020 indik Pelestarian Tanaman Lokal Bali indik Taman Gumi Banten, Usada lan Penghijauan.
Indik memargine program Pekarangan Pangan Lestari (P2L) puniki, Ida Bagus Wisnuardhana maosan Pemerintah Pusat melarapan APBN Dekonsentrasi Badan Ketahanan Pangan Kementrian Pertanian lan melarapan APBD Provnsi Bali sampun nyarengin miayanin parikrama P2L puniki. Ring warsa 2020, parikrama P2L kalaksanayang olih 70 KWT sane wenten ring Bali, sekadi P2L undag tetincap 32 KWT kaicen dana stimulus suwang-suwang Rp. 15 juta lan P2L baga numbuhan 38 KWT kaicen dana stimulus sane suwang-suwangne Rp. 50 yuta.
"70 KWT puniki sampun nerima dana stimulus sane kaserahan olih Ibu Ketua TP PKK Provinsi Bali, Ny. Putri Suastini Koster ring pinanggal 6 Agustus 2020, dan dahat mawiguna duk Gubernur Wayan Koster ngamedalang Surat Edaran (SE) Nomor 15036 Warsa 2020 indik Program Pasar Gotong Royong Krama Bali, sane pikolih anyi program Pekarangan Pangan Lestari (P2L) puniki taler kaadol ring Pasar Gotong Royong Krama Bali, raris pikolih meadolanne kaangge Kas Kelompok rikala nincapang utsaha ngolah pikolih sinalih tunggilne," sineb Ida Bagus Wisnuardhana ring ajeng Gubernur Bali sane taler dados Ketua DPD PDI Perjuangan Provinsi Bali. (Gix)
Komentar